უკრაინის მოკავშირეებმა უზრუნველყვეს დაფინანსების გამოყოფა, რომელიც საჭიროა ჩეხეთის ინიციატივის განსახორციელებლად ასობით ათასი საარტილერიო ჭურვის შესაძენად. ამის შესახებ Bloomberg იუწყება.
გამოცემის წყაროები აცხადებენ, რომ თითქმის ყველა თანხის მიღების შემდეგ, საარტილერიო ჭურვები უკრაინას, შესაძლოა, რამდენიმე კვირაში მიეწოდოს. ზუსტი თარიღები დამოკიდებული იქნება სახელშეკრულებო ვალდებულებებზე და მიწოდების გრაფიკზე.
მოსალოდნელია, რომ ამ კვირის ბოლოს ცალკე დისკუსია შედგება ევროკავშირის თავდაცვისა და საგარეო საქმეთა მინისტრებს შორის დეტალების განსახილველად.
Bloomberg-ის შეფასებით, უკრაინას თვეში სულ მცირე 200 ათასი საბრძოლო მასალა ესაჭიროება რუსული ჯარების წინააღმდეგ ბრძოლის გასაგრძელებლად.
ჩეხეთის მთავრობამ ინიციატივის შესახებ რამდენიმე კვირის წინ განაცხადა. თებერვლის შუა რიცხვებში მიუნხენის უსაფრთხოების კონფერენციაზე ჩეხეთის პრეზიდენტმა პეტრ პაველმა მოუწოდა გამოიჩინონ „იგივე გამჭრიახობა, რასაც უკრაინელი ჯარისკაცები ავლენენ ფრონტზე“ და ერთობლივად შეიძინონ საბრძოლო მასალა და აღჭურვილობა უკრაინისთვის მთელ მსოფლიოში.
პეტრ პაველმა მაშინ განაცხადა, რომ ჩეხეთმა ნატო-ს სხვა ქვეყნებთან ერთად, მათ შორის დანიასა და კანადასთან ერთად, მოიძია ნახევარი მილიონი 155 მმ-იანი ჭურვი და 300 ათასი 122 მმ-იანი ჭურვი, რომელთა მიწოდება უკრაინისთვის შესაძლებელია რამდენიმე კვირაში, როგორც კი ამ საბრძოლო მასალის შესაძენად საკმარისი თანხა შეგროვდება.
ინიციატივას შეუერთდნენ ნიდერლანდები, რომელმაც 250 მილიონი ევრო გამოყო საბრძოლო მასალის შესაძენად, ბელგია, რომელიც მზად არის 200 მლნ ევრო გამოყოს. ჩეხეთის ინიციატივას ასევე მხარი დაუჭირეს საფრანგეთმა, გერმანიამ და ლატვიამ.
