ნიკი ჰეილიმ ოთხშაბათს განაცხადა, რომ აშშ-ის საპრეზიდენტო არჩევნების მარათონს ოფიციალურად გამოეთიშა. ამის შესახებ მან ჩარლსტონში სიტყვით გამოსვლისას თქვა.
ამრიგად, ნიკი ჰეილის გადაწყვეტილების შედეგად, რესპუბლიკური პარტიიდან საპრეზიდენტო არჩევნებში მონაწილეობისთვის მხოლოდ ერთი კანდიდატი დარჩა, აშშ-ის ყოფილი პრეზიდენტი დონალდ ტრამპი.
„მოვიდა დრო, შევაჩერო ჩემი კამპანია. მე ვთქვი, რაც მსურს, რომ ამერიკელებმა თავიანთ ხმებს მოუსმინონ. მე ეს გავაკეთე. არაფერს ვნანობ“, – თქვა ნიკი ჰეილიმ,რომელიც რესპუბლიკური პარტიიდან პრეზიდენტობის კანდიდატად წარდგენისთვის იბრძოდა.
ჰეილიმ ტრამპს მიულოცა, თუმცა მისი, როგორც პრეზიდენტობის კანდიდატის მხარდაჭერისგან თავი შეიკავა.
„მე ვულოცავ მას და ყოველივე კარგს ვუსურვებ. მე ყველას კარგს ვუსურვებ, ვინც გახდება ამერიკის პრეზიდენტი. ჩვენი ქვეყანა იმდენად ძვირფასია, არ უნდა დავუშვათ, რომ ჩვენმა განსხვავებებმა დაგვყოს. ახლა დონალდ ტრამპის საქმეა, დაიმსახუროს ჩვენი პარტიის იმ წევრების ხმები და სხვებისაც, ვინც მას არ დაუჭირა მხარი“, – განაცხადა ნიკი ჰეილიმ.
ჰეილიმ ტრამპის წინააღმდეგ უფრო დიდხანს გაძლო, ვიდრე რომელიმე სხვა რესპუბლიკელმა პრეტენდენტმა.
გაერო-ში ელჩის საგარეო პოლიტიკის გამოცდილებიდან გამომდინარე, ჰეილი მთელი თავისი კამპანიის განმავლობაში ხაზგასმით აღნიშნავდა, რომ შეერთებული შტატები უნდა დაეხმაროს უკრაინას რუსულ აგრესიასთან ბრძოლაში.
