ევროკავშირი ღაზის სექტორში ჰუმანიტარული დახმარების განაწილებისას, რომლის დროსაც 100-ზე მეტი პალესტინელი დაიღუპა, საერთაშორისო გამოძიებას მოითხოვს.
ევროკავშირის საგარეო პოლიტიკური უწყების ხელმძღვანელმა, ჯოზეფ ბორელმა ჰუმანიტარული დახმარების დარიგებისას მშვიდობიანი მოქალაქეების დაცვაზე პასუხისმგებლობა ისრაელს დააკისრა, რადგან ისრაელი ატარებს ღაზის სექტორში სახმელეთო სამხედრო ოპერაციას.
ბორელმა კიდევ ერთხელ დაგმო „ჰამასის“ თავდასხმები ისრაელზე და „ჰამასის“ მებრძოლების მიერ გატაცებული მძევლების გათავისუფლება მოითხოვა. მისივე თქმით, ევროკავშირი მხარს უჭერს ისრაელისა და „ჰამასის“ მოლაპარაკებების მონაწილეთა ძალისხმევას.
„მოვითხოვთ ამ ტრაგიკული ინციდენტის დამოუკიდებელ საერთაშორისო გამოძიებას, რომელიც წარმოადგენს მოვლენების მკაფიო სურათს და გამოავლენს დამნაშავეებს. ნებისმიერ შემთხვევაში, პასუხისმგებლობა საერთაშორისო კანონმდებლობის დაცვასა და მშვიდობიანი მოსახლეობისთვის ჰუმანიტარული დახმარების განაწილების დაცვაზე ეკისრება ისრაელს. ამ ინციდენტის მიზეზი იყო ისრაელის არმიის მიერ დაწესებული შეზღუდვები და დაბრკოლებებ, რომლებსაც აგრესიული ექსტრემისტები ჰუმანიტარული დახმარების მიწოდებას უქმნიან “, - ხაზგასმით აღნიშნა ბორელმა.
29 თებერვალს ღაზის სექტორში ჰუმანიტარული ტვირთის დარიგებისას 112 ადამიანი დაიღუპა და 700-ზე მეტი დაშავდა. „ჰამასი“ ისრაელის არმიას პალესტინელების მიმართულებით ცეცხლის გახსნაში ადანაშაულებს, რასაც ისრაელი უარყოფს. ისრაელის მხარის განცხადებით, ინციდენტს გამოიძიებენ და დეტალებს საზოგადოებას აცნობებენ.
