რუსეთის პრეზიდენტმა ვლადიმირ პუტინმა განაცხადა, რომ 1939 წელს თავად პოლონეთმა აიძულა ნაცისტური გერმანია მას თავს დასხმოდა.
ამერიკელ ჟურნალისტთან, ტაკერ კარლსონთან ინტერვიუში პუტინმა თქვა, რომ პოლონეთმა "ზედმეტად ძლიერად ითამაშა" და გახდა "ზედმეტად უმართავი", რითაც "აიძულა" ადოლფ ჰიტლერი მის წინააღმდეგ აგრესია დაეწყო.
პუტინის მტკიცებით, პოლონეთი, გერმანიის მიმართ მტრობის მიუხედავად, ნაცისტურ რეჟიმთან თანამშრომლობდა. მისი თქმით, არქივებიდან მოპოვებული დოკუმენტები მიუთითებს იმაზე, რომ ჰიტლერმა პოლონეთს შესთავაზა სამშვიდობო ხელშეკრულების დადება დანციგის დერეფნის გადაცემით. ეს ტერიტორია პირველი მსოფლიო ომის შემდეგ პოლონეთს გადაეცა და ჰიტლერი ცდილობდა მის დაბრუნებას მშვიდობიანად. თუმცა, პუტინის თქმით, პოლონეთმა უარი თქვა, რამაც ომის დაწყება გამოიწვია.
„პოლონელებმა აიძულეს ეს, მათ ზედმეტად ითამაშეს და აიძულეს ჰიტლერი პოლონეთით დაეწყო მეორე მსოფლიო ომი. რატომ დაიწყო ომი 1939 წლის 1-ელ სექტემბერს პოლონეთიდან? იგი უმართავი აღმოჩნდა. ჰიტლერს სხვა არჩევანი არ ჰქონდა თავისი გეგმების განსახორციელებლად [გარდა] პოლონეთიდან {ომის} დაწყებისა“, - დასძინა რუსეთის პრეზიდენტმა.
მან ასევე აღნიშნა, რომ ჩეხოსლოვაკიის დაყოფაში გერმანიასთან ერთად პოლონეთიც მონაწილეობდა. პუტინმა აღნიშნა, რომ საბჭოთა კავშირმა პოლონეთს სთხოვა მიეცა უფლება ჯარების შეყვანაზე ჩეხოსლოვაკიაში მხარდასაჭერისთვის, მაგრამ პოლონეთის საგარეო საქმეთა მინისტრი დაემუქრა, რომ ჩამოაგდებდა საბჭოთა თვითმფრინავებს, თუ ისინი პოლონეთის ტერიტორიაზე გადაფრენას შეეცდებოდნენ.
„პოლონეთი იმ პოლიტიკის მსხვერპლი გახდა, რომელასაც ჩეხოსლოვაკიის მიმართ ატარებდა, რადგან ცნობილი მოლოტოვ-რიბენტროპის პროტოკოლების მიხედვით, ამ ტერიტორიების ნაწილი რუსეთს გადაეცა, მათ შორის დასავლეთ უკრაინის. რუსეთი, საბჭოთა კავშირის სახელით, დაბრუნდა თავის ისტორიულ ტერიტორიებზე“, - თქვა პუტინმა.
