ორი რუსული სტრატეგიული ბომბდამშენი Tu-95 ალასკის სანაპიროებთან, შეერთებული შტატების სიახლოვეს შენიშნეს.
რუსეთის თავდაცვის სამინისტროს მტკიცებით, ბომბდამშენები ნეიტრალურ წყლებზე დაფრინავდნენ.
მათივე თქმით, ბომბდამშენების ფრენა ბერინგისა და ჩუკოტკის ზღვების თავზე 9 საათის განმავლობაში გაგრძელდა.
ბომბდამშენებს თან ახლდნენ რუსული Su-30 ტიპის ავიაგამანადგურებლები.
"ფრენა განხორციელდა საჰაერო სივრცის გამოყენების საერთაშორისო წესების მკაცრი დაცვით. შორი დისტანციის ავიაციის პილოტები რეგულარულად დაფრინავენ არქტიკის, ჩრდილო ატლანტიკის, შავი ზღვის, ბალტიის ზღვისა და წყნარი ოკეანის ნეიტრალურ წყლების თავზე", - ნათქვამია თავდაცვის სამინისტროს განცხადებაში.
რუსეთი ხშირად ატარებს წვრთნებს ნატოს ტერიტორიის მახლობლად, მაგრამ ამტკიცებს, რომ ის რჩება საერთაშორისო საჰაერო სივრცეში და არასოდეს არღვევს სხვა ქვეყნების საჰაერო სივრცეს.
