დიდი ბრიტანეთისა და ჩრდილოეთ ირლანდიის გაერთიანებული სამეფოს აწ გარდაცვლილი დედოფლის, ელისაბედ მეორის ავტომობილი The Loire blue Range Rover-ი აუქციოენზე გაიყიდება.
ავტომობილი სამეფო ოჯახის კუთვნილებაში იყო 2016-2017 წლებში.
მუქი ლურჯი ფერის ავტომობილი, სპილოსძვლისფერი ტყავის ინტერიერით, არაერთხელ მოექცა მედიის ყურადღების ქვეშ. განსაკუთრებით, 2016 წლის აპრილში, როდესაც ბრიტანეთს სახელმწიფო ვიზიტით სტუმრობდნენ აშშ-ის პრეზიდენტი და პირველი ლედი, ბარაკ და მიშელ ობამები.
უინძორების სასახლეში დაგეგმილ ლანჩზე ბარაკ და მიშელ ობამები, დედოფალ ელისაბედსა და პრინც ფილიპთან ერთად, სწორედ ამ მანქანით მივიდნენ.
მანქანა საგანგებოდ სამეფო ოჯახისთვის დამზადდა, იგი აღჭურვილია სპეციალურად ადაპტირებული ფიქსირებული საფეხურებით, ასევე დიზაინში დედოფლის დაკვეთით შეტანილია გარკვეული მოდიფიკაცია, რათა მონარქისთვის უფრო მოსახერხებელი ყოფილიყო.
ავტომობილს, რომელსაც დედოფალი იყენებდა, კომპანია Bramley Motor Cars-ი ყიდის. მისი საწყისი ღირებულება £224 850 ფუნტია.
