დიდი ბრიტანეთისა და ჩრდილოეთ ირლანდიის გაერთიანებული სამეფოს შემადგენლობაში შემავალი ჩრდილოეთ ირლანდიის პირველი მინისტრი, მთავრობის კაბინეტის მეთაური, ისტორიაში პირველად გახდა ნაციონალისტური პარტია "შინ ფეინის" (Sinn Fein) წარმომადგენელი მიშელ ო’ნილი.
47 წლის ო’ნილმა პირობა დადო, რომ ის იქნება "ყველას მინისტრი". მისი პარტია ჩრდილოეთ ირლანდიის გაერთიანებული სამეფოს შემადგენლობიდან გასვლისა და ირლანდიის რესპუბლიკასთან გაერთიანების მომხრეა.
ბრიტანული მედია შენიშნავს, რომ თავის საინაუგურაციო სიტყვაში პირველ მინისტრს არ უხსენებია ირლანდიასთან გაერთიანება და აქცენტი ერთიანობასა და ეკონომიკურ საკითხებზე გააკეთა.
ჩრდილოეთ ირლანდიის პარლამენტის მიერ პირველ მინისტრად მიშელ ო’ნილის დანიშვნა შესაძლებელი გახდა მას შემდეგ, რაც "შინ ფეინის" პრობრიტანულმა მეტოქემ, დემოკრატიულ იუნიონისტთა პარტიამ დაასრულა ბოიკოტი და დათანხმდა კოალიციური მთავრობის ფორმირებას.
2022 წლის მაისში გამართულ საპარლამენტო არჩევნებში გამარჯვებული პარტია „შინ ფეინი“ იუნიონისტთა პარტიის ბოიკოტის გამო ვერ ახერხებდა მთავრობის ჩამოყალიბებას.
ამ დრომდე, ჩრდილოეთ ირლანდიის პირველი მინისტრის თანამდებობას ყოველთვის იუნიონისტთა პარტიის (DUP), გაერთიანებული სამეფოს შემადგენლობაში დარჩენის მომხრეთა წარმომადგენელი იკავებდა.
