შაბათს, ბერლინსა და გერმანიის ზოგიერთ სხვა ქალაქში გაიმართა ულტრამემარჯვენეთა საწინააღმდეგო მორიგი საპროტესტო აქცია, რომელშიც ათიათასობით ადამიანმა მიიღო მონაწილეობა.
აქციის ზოგიერთმა მონაწილემ ასევე მოითხოვა მემარჯვენე პოპულისტური პარტიის "ალტერნატივა გერმანიისთვის" (AfD) აკრძალვა.
ბერლინის პოლიციის ინფორმაციით, გერმანიის დედაქალაქში, ბუნდესტაგის შენობასთან დაახლოებით 150 000 ადამიანი შეიკრიბა.
ანალოგიური აქცია გაიმართა ფრაიბურგში, ბადენ-ვიურტემბერგის ფედერალურ მიწაზე. პოლიციის ცნობით, მასში 30 000 ადამიანი მონაწილეობდა.
ჩრდილოეთ რაინ-ვესტფალიის ფედერალურ შტატში, ქალაქ კრეფელდში 10 000-მდე ადამიანი გამოვიდა ქუჩებში. ქალაქ შველმში – 2500 ადამიანი, ქალაქებში ჰერდეკესა და ვიურსელენში – 500-500 ადამიანი.
ჩრდილოეთ რაინ-ვესტფალიის შინაგან საქმეთა სამინისტროს ხელმძღვანელმა, ჰერბერტ რეულმა მოუწოდა მოქალაქეებს გააგრძელონ ბრძოლა მემარჯვენე რადიკალური იდეების წინააღმდეგ ყველგან, სადაც კი ხელი მიუწვდებათ.
მემარჯვენე რადიკალების წინააღმდეგ დემონსტრაციები გერმანიაში დაახლოებით სამი კვირის წინ დაიწყო, მას შემდეგ რაც Correctiv-მა გამოაქვეყნა ულტრამემარჯვენე პარტიის, „ალტერნატივა გერმანიისთვის“ წევრებსა და სხვა მემარჯვენე ორგანიზაციებს შორის საიდუმლო შეხვედრის ამსახველი მასალები. ამ შეხვედრაზე ისინი განიხილავდნენ გერმანიიდან ლტოლვილებისა და სხვა უცხოელების მასობრივი გაძევების შესაძლებლობას.
იანვარში მემარჯვენე ექსტრემიზმის წინააღმდეგ გამართულ აქციას შეუერთდნენ გერმანიის კანცლერი ოლაფ შოლცი და საგარეო საქმეთა მინისტრი ანალენა ბერბოკი.
