2022 წლის გაზაფხულზე რუსეთის შავი ზღვის ფლოტი 70-ზე მეტი გემისგან შედგებოდა. თუმცა, უკრაინის ომის დროს რუსეთმა ღია ზღვაში და ნავსადგურებში, 13 ხომალდი და სევასტოპოლში შავი ზღვის ფლოტის შტაბი დაკარგა. შემდეგ კი იძულებული გახდა დაეტოვებინა უკრაინის სანაპიროები. ამის შესახებ The Moscow Times-ი გამოცემა Bild-ზე დაყრდნობით იუწყება.
უკრაინის საკითხებში გერმანელი ექსპერტის მატია ნელესის თქმით, თუ გემების მთლიან ტონაჟს გავითვალისწინებთ, ფლოტის დანაკარგებმა უკვე 20%-ს მიაღწია.
ისტორიკოსი იან ბერენდსი ფრანკფურტის ვიადრინის ევროპული უნივერსიტეტიდან აღნიშნავს, რომ რუსეთი ისტორიულად არ იყო მნიშვნელოვანი სამხედრო-საზღვაო ძალა, მისი სიძლიერე კი ყოველთვის მის ჯარში იყო და არა საზღვაო ფლოტში. ის ასევე ხაზს უსვამს, რომ 2022 წლის შემდეგ უკრაინის წარმატებები რუსული ხომალდების წინააღმდეგ მიუთითებს რუსეთში თანამედროვე ტექნოლოგიების ნაკლებობაზე და მეზღვაურების არაპროფესიონალიზმზე.
საერთო ჯამში, ორწლიანი ომის დროს, რუსეთმა დაკარგა 20-ზე მეტი ხომალდი, მათ შორის სადესანტო ხომალდები, წყალქვეშა ნავები და ფლაგმანი კრეისერი „მოსკვა“. ბოლო დიდი დანაკარგი იყო ანექსირებულ ყირიმში რუსული სარაკეტო ხომალდი „ივანოვეცი“.
უკრაინის ძალებმა „ივანოვეცი“ 1-ელი თებერვლის ღამეს ააფეთქეს.
მანამდე, 26 დეკემბერს, ფეოდოსიის პორტში ფრთოსანი რაკეტით განადგურდა დიდი სადესანტო გემი ნოვოჩერკასკი. შედეგად, სავარაუდოდ, 70-ზე მეტი მეზღვაური დაიღუპა.
რუსეთის შავი ზღვის ფლოტი ნახევარკუნძულზე დაუცველი აღმოჩნდა, ყირიმის თავდაცვის გასაძლიერებლად გაწეული უზარმაზარი ხარჯების მიუხედავად.
2014 წელს, ნახევარკუნძულის ანექსიისთანავე, რუსეთის თავდაცვის მინისტრმა სერგეი შოიგუმ პირობა დადო, რომ 2020 წლამდე 86 მილიარდი რუბლის ინვესტიციას ჩადებდა საჰაერო თავდაცვასა და საზღვაო ქვეითების დანაყოფებში. მაგრამ ამის მიუხედავად, რუსეთის ძალებმა მაინც ვერ აიცილა კიევის წარმატებული თავდასხმები.
