მოსკოვში ალექსანდროვის ბაღში უკრაინის წინააღმდეგ მებრძოლი მობილიზებული სამხედო მოსამსახურეების ცოლების აქცია გაიმართა, მოთხოვნით დააბრუნონ ჯარისკაცები ფრონტიდან სახლში. ამის შესახებ "დოიჩე ველე" რუსულ მედიაზე დაყრდნობით იუწყება. აქციის ორგანიზატორო იყო მოძრაობა „გზა სახლისკენ“. რუსული მედიის ცნობით, მოსკოვის კრემლის კედელთან 200-მდე ადამიანი შეიკრიბა.
მოძრაობა მსგავს აქციებს ყოველ კვირას მართავს რუსეთის ქალაქებში, თუმცა ამჯერზე მიტინგის ჩატარება მოსკოვში გადაწყვიტა.
აქციის დაწყებიდან დაახლოებით ერთ საათში მისმა მონაწილეებმა და ჟურნალისტებმა, განაცხადეს, რომ პოლიციამ მედიასაშუალებების წარმომადგენლებისა და დემონსტრანტების დაკავება დაიწყო. მედიის ინფორმაციით, პოლიციელებმა საერთო ჯამში 27 ადამიანი დააკავეს, მათ შორის უმეტესობა ჟურნალისტია.
