ერაყის ხელისუფლების განცხადებით, შეერთებული შტატების მიერ ქვეყნის ტერიტორიაზე განხორციელებულ საჰაერო თავდასხმებს 16 ადამიანი ემსხვერპლა, მათ შორის სამოქალაქო პირები.
ბაღდადის თქმით, იერიშების შედეგად 25 ადამიანი დაშავდა.
ერაყმა დაგმო შეერთებული შტატების საჰაერო თავდასხმები ქვეყნის ტერიტორიაზე.
ერაყის შეიარაღებული ძალების სპიკერის იაჰია რასულის განცხადებით, "ეს არის ერაყის სუვერენიტეტის დარღვევა".
მისი თქმით, აშშ-ს ქმედებები "ძირს უთხრის ერაყის მთავრობის მშვიდობისკენ მიმართულ ძალისხმევას და ქმნის საფრთხეს, რომელსაც შეიძლება მოჰყვეს საშინელი შედეგები ერაყისა და მთელი რეგიონის უსაფრთხოებისა და სტაბილურობის თვალსაზრისით".
როგორც იუწყებიან, ცოტა ხნის წინ, თავდასხმასთან დაკავშირებით, ერაყის საგარეო საქმეთა სამინისტროში დაიბარეს აშშ-ის ელჩი და საპროტესტო ნოტა გადასცეს.
შეგახსენებთ, შეერთებულმა შტატებმა საპასუხო დარტყმები განახორციელა სირიისა და ერაყის ტერიტორიებზე პროირანულ ობიექტებზე, რომლებსაც იყენებდნენ ირანის ისლამური რევოლუციის გვარდიის "ალ-ყუდსის" ძალები და მასთან დაკავშირებული ისლამისტური ჯგუფები.
დარტყმები განხორციელდა 85-ზე მეტ სამიზნეზე მრავალი თვითმფრინავის გამოყენებით, მათ შორის შორი დისტანციური ბომბდამშენებით.
ჯონ კირბის განცხადებით, ეს იყო აშშ-ის პასუხი იორდანიაში ამერიკულ ბაზაზე უპილოტო თვითმფრინავის თავდასხმაზე, რომლის შედეგადაც დაიღუპა სამი ამერიკელი ჯარისკაცი, ხოლო 34 დაიჭრა.
