საქართველოს პირველი პრეზიდენტის ზვიად გამსახურდიას შვილები, საქმის გამოსაძიებლად სპეციალური პროკურორის დანიშვნას ითხოვენ. კონსტანტინე გამსახურდია ამბობს, რომ საპარლამენტო უმრავლესობის პოზიცია, რომ ზვიად გამსახურდიას მკვლელობის საქმის გამოძიება 5 წლით გაახანგრძლიდება, წინგადადგმული ნაბიჯია. თუმცა აქვე აღნიშნავს, რომ ამ დრომდე არაფერი გაკეთებულა და, შესაბამისად, მომდევნო 5 წელში საქმე წინ არ წაიწევს.
„ის იყო წინ გადადგმული ნაბიჯი და კარგია რომ გამოძიება არ შეწყდება. მაგრამ ისმის კითხვა, როგორი იქნება ის გამოძიებამ, რომელიც გაგრძელდება კიდევ 5 წელიწადს. თუ ის ისე გაგრძელდება როგორიც აქამდე იყო არავითარი აზრი ამას არ ექნება. ამის გამო მე ვფიქრობ, რომ გამოსავალი არის სპეციალური პროკურორის დანიშვნა, რომელსაც ენდობა როგორც ოჯახი ისე ფართო საზოგადოება“,-განაცხადა კონსტანტინე გამსახურდიამ.
პირველი პრეზიდენტის შვილები ამბობენ, რომ პროკურატურამ დამოკიდებულება უნდა შეცვალოს და დაიწყოს რეალური ნაბიჯების გადადგმა.
„თუ 25 წელიწადი არაფერი გაუკეთებიათ 5 წელიწადში გააკეთებენ რამეს? ჩვენ ვთავაზობთ ხელისუფლებას გამოსავალს, დაინიშნოს პროკურორად საზოგადოებისა და ნდობით აღჭურვილი პირი, რომელსაც ექნება შესაბამისი გამოცდილება და შესაბამისი კვალიფიკაცია. არსებობს რამდენიმე კანდიდატურა და ეს იქნება გამოსავალი და წარმატების საწინდარი, რომ ეს საქმე გაიხსნება და მივალთ ლოგიკურ ფინალამდე,“-განაცხადა ცოტნე გამსახურდიამ.
გამსახურდიების ოჯახის წევრები უკვე მე-10 დღეა მთავარ საგამოძიებო უწყებასთან შიმშილობენ.
