რუსეთის საგარეო საქმეთა სამინისტროს ოფიციალურმა წარმომადგენელმა ანდრეი ნესტერენკომ დღეს მოსკოვში გამართულ ბრიფინგზე რუსული მედიის ყურადღება კვლავ ევროკავშირის მიერ შექმნილი 2008 წლის აგვისტოს მოვლენების გამომწვევი მიზეზების ფაქტების დამდგენი კომისიის მიერ გაკეთებულ დასკვნაზე გამახვილა, რომელსაც ჰაიდი ტალივინი ხელმძღვანელობდა.
"27 მაისს ევროკავშირის მიერ შექმნილ კომისიას ჰაიდი ტალიავინის ხელმძღვანელობით ეუთოს მუდმივმოქმედი საბჭოს ტრიბუნა დაეთმო, იმისათვის, რომ კომისიის მიერ 2008 წლის აგვისტოში სამხრეთ ოსეთში მომხდარი მოვლენების შესახებ მომზადებული ანგარიშიდან ძირითადი დასკვნა გაეკეთებინა", _ განაცხადა ნესტერენკომ და აღნიშნა, რომ რუსეთს საგარეო საქმეთა სამინისტრო აღნიშნავს "ტალიავინის მისწრაფებას, შეინარჩუნოს ობიექტური და დაბალანსებული ხაზი".
"მიუხედავად იმისა, რომ ტალიავინს თავიდანვე თითქოს წამოცდა ის, რომ ევროკავშირის ისტორიაში პირველად შექმნილი ფაქტების დამდგენი კომისია არ აპირებს გახდეს ერთგვარი "ტრიბუნალი" ან "მოამზადოს სამართლებრივი არგუმენტაცია მომავალი ნაბიჯებისთვის", ტალიავინმა პირდაპირ ხელი დაადო საქართველოს, როგორც მხარეს, რომელმაც ომი დაიწყო, განახორციელა რა 2008 წლის 7 აგვისტოს ღამით საარტილერიო იერიში სამხრეთ ოსეთის მძინარე დედაქალაქ ცხინვალზე, რასაც მისი სიტყვებით "გამართლება არ აქვს", _ აცხადებს ნესტერენკო და დასძენს: "ამით ხდება აღიარება იმისა, რომ სამხედრო მოქმედებები საქართველოს შეიარაღებულმა ძალებმა დაიწყეს".
რუსეთის საგარეო საქმეთა სამინისტროს წარმომადგენელი ხაზგასმით აღნიშნავს, რომ ტალიავინის ანგარიშში ასევე არის საუბარი ე. წ. სამხრეთ ოსეთელების კანონიერ უფლებაზე, დაეცვათ საკუთარი თავი.
"გამოვყოფ ასევე ანგარიშის პასაჟს, რომელშიც საუბარია სამხრეთ ოსების თავდაცვის ლეგიტიმურობაზე საქართველოს უკანონო თავდასხმის პასუხად", _ აცხადებს ნესტერენკო და ტალიავინის ანგარიშის შესახებ ბრიფინგზე საუბრის საჭიროებას ხსნის.
"ევროკავშირის მიერ დანიშნული მომხსენებლის დასკვნები მხოლოდ ერთი მიზეზით მომყავს _ ზემოთ მოყვანილი მოვლენების შეფასებისას ობიექტურობის დამკვიდრებისათვის. ეს მოვლენები მრავალი ქვეყნის მიერ ოფიციალურ დონეზე, როგორც ცნობილია, განიხილება ზუსტად საწინააღმდეგო პოზიციიდან _ ეს კი კარგი მაგალითია იმისა, თუ როგორ ხდება საერთაშორისო ცხოვრებაში მომხდარი ცალკეული მოვლენების მიმართ ორმაგი სტანდარტების გამოყენება", _ აცხადებს ნესტერენკო.
