"თუ საქართველოში კანონის ძალა არ იმოქმედებს, იმოქმედებს ძალის კანონი", - ამის შესახებ ქვეყნის ყოფილი პრემიერი და მოძრაობა "სამართლიანი საქართველოსთვის" ლიდერი ზურაბ ნოღაიდელი აცხადებს.
"შევეგუოთ იმას, რომ უდანაშაულო ადამიანებს იჭერენ, ამაზე თავი დავღუნოთ და არაფერი ვქნათ? მე ასეთ მდგომარეობას არ შევეგუები. თუ საქართველოს შემდგომი განვითარების სცენარი გულისხმობს იმას, რომ ხელისუფლება არჩევნებზე 65 პროცენტს დაიწერს და ჩვენ თავი უნდა დავღუნოთ, ყველას გასაგონად ვამბობ _ თავს არ დავღუნავთ. თუ არ იმოქმედებს კანონის ძალა, იმოქმედებს ძალის კანონი. ყველა ხერხს მივმართავ, პროვოკაციაზედაც კი წავალ", - აცხადებს ნოღაიდელი.
აღნიშნულ კონტექსტში, საქართველოს ყოფილი პრემიერი ყველას მოუწოდებს, მისი "ტერმინოლოგიით ნუ მანიპულირებენ და თუ რამის გაკეთება უნდათ, გააკეთონ".
მოძრაობა "სამართლიანი საქართველოსთვის" ლიდერი იმასაც აცხადებს, რომ ხელისუფლებას არჩევნების გაყალბების უამრავი მექანიზმი აქვს.
"მან თავის თავზე მოირგო საარჩევნო სისტემა, რაც ძალიან მნიშვნელოვანი კომპონენტია; საარჩევნო ადმინისტრაცია მზად არის შეასრულოს ხელისუფლების ყველა სურვილი; ძალიან ადვილია საარჩევნო სიებით მანიპულირება; ხელისუფლება საარჩევნო კამპანიისთვის ხარჯავს ბიუჯეტიდან მითვისებულ და ბიზნესისითვის "შეწერილ" თანხას. თუმცა მთავარი მაინც ხალხის დაშინებაა. არჩევნების გაყალბების ყველა მექანიზმის ამოქმედებისა და ხალხის დაშინების გარეშე სააკაშვილი ხელისუფლებას ვერ შეინარჩუნებს, გიგი უგულავა ვერ გაიმარჯვებს და "ნაციონალური მოძრაობა" არჩევნებში ყველგან დამარცხდება", - მიიჩნევს ის.
გარდა ამისა, ნოღაიდელის შეფასებით, 50-პროცენტიანი ბარიერის გაუქმებითა და მერის პირდაპირი არჩევის წესის შემოღებით, საარჩევნო სისტემა გაუარესდა.
