ხვალ, 29 აპრილს, ენერგეტიკისა და წყალმომარაგების მარეგულირებელი ეროვნული კომისია სხდომაზე, კომპანია ~ყაზტრანსგაზ-თბილისის~ დროებითი მენეჯმენტისთვის მმართველობის ვადის გაგრძელების საკითხს განიხილავს.
კომისიის ინფორმაციით, სემეკ-ს უფლებამოსილების ერთი წლით გაგრძელების თხოვნით ~ყაზტრანსგაზ-თბილისის~ დროებითმა მმართველმა მიმართა.
სპეციალური მმართველი საქართველოს ენერგეტიკის და წყალმომარაგების მარეგულირებელმა ეროვნულმა კომისიამ "ყაზტრანსგაზ-თბილისში" 2009 წლის 16 მარტს დანიშნა. აღნიშნული გადაწყვეტილების მიზეზი გახდა დიდი ოდენობით კრედიტორული დავალიანება, რომელიც "ყაზტრანსგაზ-თბილისს" დაუგროვდა. კომპანიას 80 მლნ ლარზე მეტი კრედიტორული დავალიანება ერიცხებოდა, მათ შორის, 68 მლნ ლარი მიღებული ბუნებრივი გაზისთვის საქართველოს ნავთობისა და გაზის კორპორაციის.
სემეკ-ი სხდომაზე 14 საკითხს განიხილავს.
