8 მარტის ქუჩაზე საცხოვრებელი სახლი ჩამოინგრა.
ინციდენტი დაახლოებით ერთი საათის წინ მოხდა. სახლს საფუძველი გადაუღებელი წვიმის შედეგად გამოეცალა.
ადგილზე ამ დროისთვის სამაშველო სამსახურის თანამშრომლები არიან მობილიზებული. შემთხვევის შედეგად არავინ დაშავებულა.
სახლის დაზარალებულ მეპატრონეს დედაქალაქის მთავრობა დაეხმარება.
აღსანიშნავია, რომ წუხანდელი ღამის განმავლობაში სამაშველო სამსახურში გამოძახების 90-მდე ზარი შევიდა. სამსახური საგანგებო რეჟიმში მუშაობს. ამ დროისთვის დედაქალაქის მასშტაბით 8 სამაშველო და 34 სახანძრო ჯგუფია მობილიზებული.
რაც შეეხება ამინდის პროგნოზს, უახლოესი სამი დღის განმავლობაში ამინდის გაუარესება მოსალოდნელი არ არის, თუმცა სინოპტიკოსების აზრით, 28 აპრილიდან ისევ იწვიმებს.
