საქართველოს პარლამენტის თავმჯდომარე დავით ბაქრაძემ პოლონეთის პრეზიდენტ ლეხ კაჩინსკის დაღუპვის გამო პოლონელ ხალხს სამძიმარი გამოუცხადა.
"დღეს მოხდა უმძიმესი ტრაგედია... მინდა ჩემი სახელით, საქართველოს პარლამენტის და ქართველი ხალხის სახელით გამოვუცხადო ჩვენი ღრმა თანაგრძნობა და თანადგომა პოლონელ ხალხს და პოლონეთის სახელმწიფოს. ლეხ კაჩინსკი იყო თავის ხალხის ლიდერი და ადამიანი, რომლის მოღვაწეობა ჭეშმარიტად ევროპულ ფასეულობებს და ღირებულებებს ემყარებოდა. პრეზიდენტი კაჩინსკი იყო თავისი ხალხის ლიდერი, იყო მიზანსწრაფული, ვაჟკაცური და მიზანდასახული ადამიანი და რაც მთავარია, ის იყო პიროვნება, რომელიც მთელი თავისი ცხოვრება იბრძოდა არა მხოლოდ პოლონეთის თავისუფლებისთვის, არამედ საქართველოს და ყველა სხვა თავისუფლებისმოყვარე ქვეყნისა და ერის თავისუფლებისთვისაც. ამასთანავე, ის იყო ნამდვილი ევროპელი ლიდერი, რომლის მოღვაწეობა ჭეშმარიტად ევროპულ ფასეულობებს და ღირებულებებს ემყარებოდა", - განაცხადა ბაქრაძემ.
ამასთან, საქართველოს პარლამენტის თავმჯდომარის შეფასებით, საქართველომ ლეხ კაჩინსკის სახით დიდი მეგობარი დაკარგა.
"პრეზიდენტი კაჩინსკი იყო საქართველოს უდიდეს მეგობარი. ჩვენ არასდროს დაგვავიწყდება 2008 წლის აგვისტოს უმძიმესი დღეები, როდესაც ის საკუთარი სიცოცხლის რისკის ფასად ჩამოვიდა თბილისში და ქართველ ხალხთან ერთად რუსთაველის გამზირზე გაატარა ის უმძიმესი საათები, როდესაც ყველა ჩვენგანი ველოდებოდით, თუ როგორ შეიძლება განვითარებულიყო მოვლენები. ჩვენ დავკარგეთ დიდი მეგობარი, პოლონეთმა დაკარგა ლიდერი, ევროპამ დაკარგა სახელმწიფო მოღვაწე", - განმარტა მან.
პოლონეთის პრეზიდენტი ლეხ კაჩინსკი დღეს ავიაკატასტროფაში დაიღუპა. თვითმფრინავმა ტუ-154-მა, რომელიც რეისს ვარშავა-სმოლენსკის მიმართულებით ასრულებდა, სმოლენსკთან დაჯდომის დროს კატასტროფა განიცადა.
