რუსეთის საგარეო საქმეთა მინისტრის მოვალეობის შემსრულებელს სერგეი ლავროვს გამოცემა The Insider-მა ელიტურ უბანში ძვირადღირებული სამსართულიანი ვილა აღმოუჩინა. გამოცემის ინფორმაციით, სოფელ ჟუკოვკაში მდებარე ვილის ფასი, რომელიც 670 კვადრატული მეტრია, 335 მლნ რუბლს შეადგენს.
ასევე, ლავროვი ფლობს საცხოვრებელ ბინას მოსკოვის ცენტრში, მეტრო პუშკინსკაიასთან ახლოს, რომლის ფართი 247 კვ. მეტრს შეადგენს. მისი საბაზრო ღირებულება 300 მლნ რუსულ რუბლს შეადგენს.
The Insider-ი წერს, რომ ლავროვს აღნიშნული ვილის შესახებ ინფორმაცია დეკლარაციაში შეტანილი ჰქონდა, თუმცა ღირებულება რეალურს არ შეესაბამებოდა.
გამოცემის ცნობით, ქონების ღირებულება მნიშვნელოვნად აღემატება ლავროვის ლეგალურ შემოსავალს. „სერგეი ლავროვისა და მისი მეუღლის წლიური შემოსავალი 4,5 მლნ რუბლია. ამ ღირებულების ქონების შესაძენად, არსებული ხელფასით, მას სულ მცირე 120 წელი დასჭირდებოდა“, - წერს გამოცემა.
სერგეი ლავროვი რუსეთის საგარეო საქმეთა სამინისტროს მე-16 წელია, რაც ხელმძღვანელობს.