ოპოზიციამ სახალხო დეპუტატების საკმარისი რაოდენობით ხელმოწერები შეაგროვა (150 -ზე მეტი) პარლამენტში ნიკოლაი აზაროვის მთავრობის გადადგომის საკითხის დასაყენებლად. განცხადება ამის შესახებ ფრაქცია „ბატკივშინას" დეპუტატმა ანდრეი პავლოვსკიმ გააკეთა. ინფორმაციას ამის შესახებ რუსული მედია ავრცელებს.
„ოპოზიციის მიერ უკვე შეგროვებულია საკმარისი რაოდენობის ხმები აზაროვის მთავრობის გადასაყენებლად", _ განაცხადა პავლოვსკიმ კიევში გამართულ პრესკონფერენციაზე.
მისივე თქმით, უმაღლესი რადის რეგლამენტის თანახმად პარლამენტის სპიკერმა ვლადიმერ რიბაკმა „5 დეკემბრის პლენარულ სხდომაზე პირველ საკითხად ნიკოლაი აზაროვის მთავრობის მიერ სამსახურებრივი მოვალეობების გადაჭარბების საკითხი უნდა დააყენოს".
ამავე დროს, პავლოვსკი აცხადებს, რომ მართალია ოპოზიცია ხმათა რაოდენობით უმრავლესობასთან აგებს, მაგრამ „გამონაკლისებიც ხომ არსებობს" და „ისინი ხდება, მაშინ როდესაც უმაღლესი რადის კედლებში ისეთი ადამიანები იკრიბებიან რომლებისთვისაც სულერთი არ არის".
მისივე თქმით, „უმაღლესი რადა ძალიან მგრძნობიარეა ქუჩაში გამოსული ადამიანების განწყობების მიმართ".
