პრეზიდენტობის კანდიდატმა ნინო ბურჯანაძემ „დემოკრატიული მოძრაობის" საარჩევნო შტაბში გახსნილი ქოლ-ცენტრი მოინახულა. როგორც მან აღნიშნა, არჩევნების დღეს აღნიშნული ცენტრი უწყვეტ რეჟიმში იმუშავებს, რათა მიიღოს ყოველწუთიერი ინფორმაციები საარჩევნო უბნებიდან:
„თქვენ ნახეთ თუ როგორ მუშაობს ქოლ-ცენტრი, ეს არის პრაქტიკულად ჩვენი ყოველდღიური და ყოველწუთიერი კონტაქტი იმ ადამიანებთან, რომლებიც ჩვენ მხარს გვიჭერენ. ჩვენ გვაქვს რეალური ინფორმაცია, რომ ძალიან ბევრი მხარდამჭერი გვყავს. ვიცით, რომ ეს ადამიანები აპირებენ არჩევნებზე მოსვლას. ჩვენ ყველაფერს გავაკეთებთ იმისათვის, რომ ვერავინ ვერ შეძლოს არჩევნების გაყალბება და ყველა ხმა დაცული იყოს. ეს ქოლ-ცენტრი არის ერთ-ერთი სერიოზული მექანიზმი ამ ხმების დაცვისა, ხვალ დილიდან, როგორც კი გაიხსნება საარჩევნო უბნები ჩვენ ყოველ ორ საათში შვაჯამებთ ინფორმაციას, რომელიც ყოველწუთიერად მოვა ადგილებიდან. ბუნებრივია, ეს ინფორმაციები ჩვენი მხრიდან გადაეგზავნება ცენტრალურ საარჩევნო კომისიას, მაგრამ დამუშავდება ჩვენთან ჩვენი იურისტების მიერ. გარდა ამისა, ჩვენ გვექნება პარალელური დათვლის სისტემა, ასე რომ ჩვენ ზუსტად გვეცოდინება რამდენი ჩვენი მომხრე მოვიდა არჩევნებზე, რამდენმა მოგვცა ხმა. ჩვენ ვმუშაობთ ყველა იმ საშუალებების გამოყენებით, რომელიც ეფექტურია იმისათვის, რომ არჩევნები ჩატარდეს მართლაც სამართლიანად და დემოკრატიულად."