საპრეზიდენტო კანდიდატი ნინო ბურჯანაძე სასტუმრო „რედისონში" ეუთოს საპარლამენტო ასამბლეის, ევროსაბჭოს საპარლამენტო ასამბლეის, ევროპარლამნტისა და ნატოს საპარლამენტო ასამბლეის მოკლევადიანი სადამკვირვებლო მისიის წარმომადგენლებს შეხვდა.
ნინო ბურჯანაძემ სტუმრები საქმის კურსში ჩააყენა ყველა იმ შეხვედრასთან დაკავშირებით, რომელიც წინასაარჩევნო კამპანიის ფარგლებში გაიმართა. როგორც მან აღნიშნა, ორჯერ შემოიარა საქართველო და დაახლოებით 200 000-მდე ადამიანს შეხვდა:
„კარგად ვიცი ადამიანების განწყობა , ძალიან ბევრი ადამიანი მიჭერს მხარს. ამავდროულად ვისაუბრე იმაზე, რომ მიუხედავად იმისა რომ შიში და ტერორი აღარ არის ქვეყანაში, მე ვიყავი ჩაყებნებული ნამდვილად უსამართლო გარემოში და აშკარაა, ადგილებზე ხდება შეთანხმებები, რომ არ დაუშვან მეორე ტური. ვისაუბრე იმაზე, რომ მანიპულირების საგანი ხდებოდა კვლევები, რომლებიც ქვეყნდებოდა ამ ხნის განმავლობაში. გარკვეულწილად ბიზნესად იქცა ეს კვლევები და საერთაშორისო ორგანიზაციებმა უნდა იზრუნონ იმაზე, რომ არ ხდებოდეს ადამიანების გონებითა და მოსაზრებებით მანიპულირება. აღვნიშნე ისიც, რომ სახელისუფლებო კანდიდატი ჩაყენებულია განსაკუთრებულ მდგომარეობაში და ეს ჩანს შეუიარაღებელი თვალითაც. ვისაუბრე საგარეო და საშინაო პოლიტიკურ საკითხებზე, იმაზე, რომ ჩემი პრიორიტეტი არის სამართლიანობის აღდგენა და შევეცადე მათთვის ამეხსნა, რას ნიშნავს ის ფასადური დემოკრატია, რომელიც იყო წინა რეჟიმის დროს და რა არის რეალური დემოკრატია, რომლისთვისაც მე ვიღწვი."
მასალის გამოყენების პირობები
