"9 წლის წინ ამ რეგიონში, ახალქალაქში საქართველოს დროშაც კი ვერ ფრიალებდა და ჩვენ რა გავკეთეთ - ავაშენეთ კარგი ქართული სკოლა, შემოვიყვანეთ ქართულის მასწავლებლები ყველა სასოფლო სკოლაში და ბავშვები აქ საუბრობენ ქართულად და რაც მთავარია, გაჩნდა ქართული შეგნება,"- ამის შესახებ საქართველოს პრეზიდენტმა მიხეილ სააკაშვილმა დღეს ახალქალაქის მოსახლეობასთან შეხვედრის შემდეგ ისაუბრა.
ქვეყნის პირველი პირის თქმით, ახალქალაქი ბოლო წლებში რეალურად დაბრუნდა საქართველოს იურისდიქციაში, თუმცა ეს რატომღაც თბილისში არავის შეუმჩნევია.
"დაიწყო დიდი პროექტები -რკინიგზა, გზა მოვიყვანეთ, გაზი მოვიყვანეთ.. ეს რკინიგზა, ყარსი-ახალქალაქის რკინიგზა საერთოდ ცვლის ყველაფერს და მართლაც, ახალქალაქი დაბრუნდა რეალურად საქართველოს იურისდიქციაში, რაც თბილისში თითქმის ვერავინ ვერ შეამჩნია, მაგრამ მე ხომ ვიცი აქ რა ხდებოდა?! ამიტომ, ის რომ დღეს ბანდიტი ჩახალიანი მოგვივარდა და ის, რომ მისი რიტორიკა, რომელიც არის სეპარატისტული რიტორიკა, რატომღაც ერთი ერთზე ემთხვევა საქართველოს მთავრობის რიტორიკას. ის იძახის, რომ თურმე 9 წელი ქვეყანას ვანგრევდით. თურმე ეს რკინიგზა ამხელა რომ ავაშენეთ, მილიარდები რომ ჩავყარეთ, გზა რომ მოვიყვანეთ და ეს ყველაფერი ავაშენეთ, ეს ნგრევა ყოფილა და ჩახალიანი იძახის, უნდა გავასამართლოთ სააკაშვილიო. სააკაშვილის გასამართლებას აქტიურად მოითხოვს სამი სუბიექტი - პუტინი-მედვედევი, ივანიშვილი და ჩახალიანი. ეს არაფერზე არ გვაფიქრებს?!", - განაცხადა მიხეილ სააკაშვილმა.
მისივე თქმით, სეპარატისტები დღეს უკვე ერთი მუჭა დარჩნენ ახალციხის რეგიონში და როგორ უმცირესობაში აღმოჩნდნენ ისინი, ყველამ იხილა. ამასთამ, ქვეყნის პირველი პირი საქართველოს მთავრობას მოუწოდებს, შეწყვიტოს ეს "ძალიან საშიში თამაშები, რადგან თავიდან ასეთი ცოტათი იწყება და მერე ისევ ყველაფერი უკან დაბრუნდება.
"ყველაფერი წყალში გადაგვეყრება, რაც ამდენი წელი ვაშენეთ. არ ღირს ეს არაფერი, პირადი ბოღმა, ღვარძლი ან თუნდაც უცხოური დავალება იმად, რომ ასეთი ხალხი გააჯეჯილო ან შკრილნიკოვის, ჩახალიანის და ამისთანების ციხიდან გამოშვებით დავაზარალოთ საქართველოს უსაფრთხოება. უნდა ვიყოთ ძალიან ფრთხილად. ამ საკითხებთან თამაშები არ შეიძლება. ეს არის ჩემი ბოლო გაფრთხილება, ბოლო რჩევა, რასაც საპრეზიდენტო ვადის ბოლოს ვუტოვებ საქართველოს მთავრობას. ეს ყველაფერი ჩვენ თავიდან ავიცილეთ ნუ დაგვაბრუნებთ არა მხოლოდ უბრალოდ შევარდნაძის ეპოქაში, არამედ ნუ წაგვიყვანთ აქ სრული ქაოსისკენ", - აღნიშნა მიხეილ სააკაშვილმა.