ახალქალაქში საქართველოს პრეზიდენტ მიხეილ სააკაშვილს და ამნისტიის საფუძველზე საპატიმროდან გათავისუფლებულ ვაჰაგან ჩახალიანს შორის სიტყვიერი დაპირისპირება მოხდა.
დაპირსპირება მას შემდეგ დაიწყო, რაც ჩახალიანმა პრეზიდენტს სამცხე-ჯავახეთის მხარეში არსებულ სალოცავებსა და რამდენიმე საკითხზე ინფორმაცია მიაწოდა. ჩახალიანის თქმით, სომხური ეკლესია 20 წელიწადია დაზიანებულია და მისი შეკეთების მცდელობა არ ყოფილა, ასევე მისი განმარტებით, რეგიონის სკოლებში სომხური ლიტერატურა სასწავლო პროგრამიდან ამოღებულია.
ჩახალიანის პრეტენზიებს მიხეილ სააკაშვილმა უპასუხა. მისი თქმით, იგი ყველა მოქალაქეს მოუსმენს, მაგრამ არ აპირებს ჩახალიანის მსგავსი ადამიანებისგან მორალის კითხვას მოუსმინოს.
"მე გავაკეთე ახალქალაქში ის, რომ თქვენისთანა სეპარატისტებს საფუძველი გაოვაცალე. ამ რეგიონში ჩემი მმართველობის დროს გაკეთდა ეს გზა, რომლითაც თქვენ დადიხართ თბილისში წინ და უკან, ამ რეგიონში უზარმაზარი, ევროპასთან დამაკავშირებელი რკინიგზა აშენდა, ამ რეგიონში გაკეთდა კურორტი, შემოვიდა სასოფლო-სამეურნეო ტექნიკა, შემოვიდა გაზი, სინათლე და გავიდა რუსული ბაზა. და შენისთანა სეპარატისტები, რომლებიც აპირებენ საქართველოს დაქუცმაცებას და გრუ-ს გოშიები მე ვერ წამიკითხავენ მორალს. ციხეში იჯექი 6 მუხლით და ძალიან მიქარა იმან, ვინც შენ ციხიდან გამოგიშვა. იმიტომ, რომ არ ვაპირებ შენისთანა ხალხმა, კრიმინალებმა მიკითხონ მე მორალი,"- მიმართა ჩახალიანს მიხეილ სააკაშვილმა.
აღნიშნული დიალოგის შემდეგ, ვაჰაგან ჩახალიანი და მასთან ერთად მყოფი რამდენიმე პირი შეძახილებით - "წადი მიშა თურქეთში!", გაიქცნენ, თუმცა მათ საქართველოს პრეზიდენტი დაედევნა და პირისპირ საუბრისკენ მოუწოდა.
"აბა მოდით, სად გარბიხართ თქვე ლაჩრებო?! გარბიხართ ლაჩარო სეპარატისტებო?! აი, 5 სეპარატისტი დარჩა აქ. აი ეს არის რაც გავაკეთეთ საქართველოში. 5-ნი დარჩნენ და იყვნენ ბევრად მეტი, გაიქეცით ლაჩარო სეპარატისტებო, თქვენი პატრონი გრუ-ს ბაზა აღარ არის აქ,"-მიმართა სააკაშვილმა ჩახალიანს და მასთან ერთად მყოფ პირებს.
