საპრეზიდენტო კანდიდატმა ნინო ბურჯანაძემ წინასაარჩევნო კამპანიის ერთი ნაწილი, საქართველოს რეგიონების შემოვლა, თელავში გამართული ხალხმრავალი შეხვედრით დაასრულა:
„მე ძალიან ბედნიერი ვარ, რომ ამდენ ადამიანს შევხვდი, მართლაც ძალიან მონატრებული მქონდა ხალხთან შეხვედრა, რადგან პრაქტიკულად ტერორის ქვეშ ვიყავით ამდენი ხნის მანძილზე და ყოველი ჩვენთან შეხვედრა ადამიანების დაპატიმრებებით სრულდებოდა. მე მოხარული ვარ, რომ ამჯერად ეს არ ხდება და ამას ნამდვილად ვაფასებთ. მე ბედნიერი ვარ, რომ დღეს ამდენი ადამიანი შეიკრიბა ერეკლეს მოედანზე, ეს მართლაც ისეთი უპრეცედენტო რაოდენობაა, რომელიც იყო ბოლო დღეების განმავლობაში ყველა დიდ ქალაქში და გუშინ სპორტის სასახლეში.
მე ვპირდები ამ ადამიანებს, რომ მათ იმედებს ნამდვილად გავამრთლებ, ჩვენ გვექნება ერთიანი, ძლიერი, სამართლიანი სახელმწიფო, რომელიც იზრუნებს საკუთარ მოსახლეობაზე. მე გაძლევთ პირობას, აქ, ერეკლეს მოედანზე, სიცოცხლის ფასად რომ დამიჯდეს, გავაერთიანებ საქართველოს. მხოლოდ მე შემწევს უნარი, რომ საქართველო გავათავისუფლო მავთულხლართებისგან. გაძლევთ პირობას, რომ ხელისუფლებაში ჩემი ყოფნის პერიოდში არასოდეს აღარ იქნება ცხინვალისა და აფხაზეთის მიმართულებით გასროლილი ტყვია და არასოდეს აღარ იქნება ქვეყანა ჩათრეული წინასწარ წაგებულ ომში. მხოლოდ მე შემიძლია პირდაპირ დიალოგის გზით მოვაგვარო რუსეთთან ურთიერთობა", - განაცხადა ნინო ბურჯანაძემ შეხვედრისას.
ნინო ბურჯანაძემ ასევე აღნიშნა: "რომ არ ყოფილიყო შარშანდელი 1-ელი ოქტომბერი, თქვენ დღეს ჩვენთან არ იქნებოდით, ასე თავისუფლად ვერ მოხვიდოდით შეხვედრაზე, იმიტომ, რომ "ნაციონალური მოძრაობა" იყო მოძალადე ხელისუფლება. მაგრამ 1-ელი ოქტომბრის შემდეგ ძალიან ბევრი დაპირება არ შესრულდა და დაიწყო კოჰაბიატაცია. ესენი არ არიან კოჰაბიტაციის დამამთავრებლები, ისინი ელჩებზე არიან დამოკიდებულები და მხოლოდ მე შემიძლია სამართლიანობის აღდგენა, რადგან მე არ ვაპირებ მოვუსმინო ვინმეს, გარდა თითოეული ქართველისა."
ნინო ბურჯანაძემ ასევე განაცხადა, რომ პრეზიდენტი არ უნდა იყოს ივანიშვილის ხათრით არჩეული და პრეზიდენტი უნდა იყოს ის ადამიანი, ვინც არის კომპეტენტური და "პატარა ბავშვივით არ უნდა გაიმეოროს ბიძინა ნაკარნახევი"