განათლების მინისტრის ყოფილი მოადგილე, "რესპუბლიკური პარტიის" ერთ-ერთი ლიდერი დავით ზურაბიშვილი პარლამენტის თავმჯდომარის თანაშემწედ დაინიშნა.
ზურაბიშვილმა ქვეყნის უმაღლეს საკანონმდებლო ორგანოში თავმჯდომარის თანაშემწედ მისი დანიშვნის შესახებ ინფორმაცია "ჯი-ეიჩ-ენთან" საუბრისას დაადასტურა, თუმცა აღნიშნა, რომ ეს პოლიტიკური თანამდებობა არ არის და მისთვის გაუგებრია რატომ გახდა ინტერესის საგანი.
ამასთან, კითხვაზე, ძირითადად რა მიმართულებით მუშაობს და როგორია მისი ფუნქციები, ზურაბშვილმა უპასუხა, რომ "რა მიმართულებითაც საჭიროა, იმ მიმართულებით მუშაობს".
"პოლიტიკური თანამდებობა ეს არ არის. სექტემბრიდან იქ ვარ. გასაიდუმლოებული კი არ არის. არ მესმის ამაზე რა საჭიროა საერთოდ კომენტარის გაკეთება. ვმუშაობ, ვმუშაობ, მორჩა. რა მიმართულებითაც საჭიროა, იმ მიმართულებით ვმუშაობ. საერთოდ ამაზე კომენტარის გაკეთება მგონია ის. რაღაცა პოლიტიკური თანამდებობა რომ იყოს, კიდევ მესმის. რამდენ ადგილზეც სამსახურს დავიწყებ რაღაცა უბრალო ადგილას, ყველაზე თუ ვაკეთე კომენტარები რა გამოვა?! ,"- განაცხადა დავით ზურაბიშვილმა.
შეგახსენებთ, რომ განათლების მინისტრის ყოფილი მოადგილე დავით ზურაბიშვილი თანამდებობიდან მას შემდეგ გაათავისუფლეს, რაც განათლების მინისტრის პოსტზე კოალიცია "ქართული ოცნების" პრეზიდენტობის კანდიდატი გიორგი მარგველაშვილი თამარ სანიკიძემ ჩაანაცვლა. სანიკიძის განცხადებით, "მოადგილის პოსტიდან ზურაბიშვილის გათავისუფლების გადაწყვეტილება პოლიტიკური არ იყო, მოადგილედ უბრალოდ, განათლების სპეციალისტი სჭირდებოდა".