საპარლამენტო უმრავლესობის წევრის ზურაბ ტყემალაძის განცხადებით, საქართველოს პრემიერ-მინისტრის ბიძინა ივანიშვილის შემცვლელი შესაძლოა, ორშაბათს ან სამშაბათს არ დასახელდეს.
როგორც ტყემალაძემ "ქართული ოცნების" პოლიტსაბჭოს დღევანდელი სხდომის დასრულების შემდეგ ჟურნალისტებთან საუბრისას აღნიშნა, მმართველი კოალიციის პოლიტიკური საბჭოს დღევანდელი შეკრების დღის წესრიგში ბიძინა ივანიშვილის შემცვლელის ვინაობაზე მსჯელობა არ ყოფილა და საუბარი წინასაარჩევნო გარემოსა და ქვეყნის ახალი პრეზიდენტის ინაუგურაციის საორგანიზაციო საკითხებს შეეხო.
"მე როგორც მგონია, ამ სამშაბათს არ დასახელდება, იმიტომ რომ კონსულტაციები გაიმართება იმ კვირის ბოლოს. არც კონსტიტუციას და არც კანონს არ დავარღვევთ და ვადაში ყველაფერი ჩაეტევა. კონსულტაციები, წარდგენა, განხილვაც, დამტკიცება და აბსოლუტურად ყველაფერი კანონის ფარგლებში მოხდება,"- განაცხადა ზურაბ ტყემალაძემ.
ცნობისთვის, კოალიცია "ქართული ოცნების" ცენტრალურ ოფისში მმართველი პარტიის პოლიტსაბჭოს სხდომა რამდენიმე საათის განმავლობაში მიმდინარეობდა.