"ნორვეგიელმა დამკვირვებლებმა 2008 წელსვე თქვეს, რომ ხურჩაში მომხდარი ტერაქტი გათამაშებული ფარსი იყო,"- ამის შესახებ სასჯელაღსრულების, პრობაციის და იურიდიული დახმარების საკითხთა მინისტრმა სოზარ სუბარმა 2008 წლის 21 მაისს ზუგდიდის რაიონის სოფელ ხურჩაში მომხდარი ტერაქტის საქმის კომენტირებისას ისაუბრა.
"მაშინ საქართველოში იყვნენ დამკვირვებლები ნორვეგიიდან, მაშინ სახალხო დამცველი ვიყავი და მჭიდროდ ვთანამშრომლობდი მათთან. მომსწრენი იყვნენ ამ ამბის და მათ პირდაპირ თქვეს, რომ ეს იყო გათამაშებული ფარსი. დღეს უკვე შინაგან საქმეთა სამინისტრომ არა მხოლოდ დადო სრული ვერსია, არამედ რეალურად დაასახელა და დააკავა ადამიანები, რომლებმაც ეს ტერაქტი ჩაიდინეს,"- განაცხადა სოზარ სუბარმა.
შეგახსენებთ, რომ 2008 წლის 21 მაისს ზუგდიდის რაიონის სოფელ ხურჩაში მომხდარი ტერაქტის გამოძიების ფარგლებში ყოფილი მაღალჩინოსნების ბრალეულობა გამოიკვეთა.
საქართველოს შინაგან საქმეთა სამინისტროს სახელმწიფო უსაფრთხოების სააგენტოს თანამშრომლებმა ტერორისტული აქტის მოწყობის ბრალდებით შსს კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა დააკავეს. შამათავასთან ერთად დაკავებულია სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია.
შსს ინფორმაციით, 2008 წლის 21 მაისს, ზუგდიდის რაიონის სოფელ ხურჩაში, მშვიდობიანი მოსახლეობის დაშინების მიზნით, რომან შამათავამ, შსს-ს სხვა მაღალ თანამდებობის პირებთან ერთად, ორგანიზება გაუკეთა და განახორციელა ტერორისტული აქტი, რამაც შექმნა ადამიანის სიცოცხლის მოსპობის და მნიშვნელოვანი ქონებრივი ზიანის განხორციელების საშიშროება, ასევე, ხელყო საზოგადოებრივი უსაფრთხოება.
გამოძიება საქართველოს სსკ-ის 323-ე მუხლის მე-2 და მე-3 ნაწილებით გათვალისწინებული დანაშაულის ნიშნებით მიმდინარეობს, რაც სასჯელის სახით 15-დან 20 წლამდე ან უვადო თავისუფლების აღკვეთას ითვალისწინებს.
