მინისტრის თქმით, საზოგადოებამ ნახა როგორი მეთოდებით ებრძოდა საკუთარ ხალხს წინა ხელისუფლება იმისათვის, რომ მომხდარიყო მათი დაშინება და საზოგადოებაში პანიკა დათესილიყო.

"თქვენ ნახეთ, რომ პრაქტიკულად გამოძიების პირობებში გამოიკვეთა სერიოზული ნიშნები, რომ ეს იყო შეკვეთილი ტერორისტული აქტი, განხორციელებული საკუთარი ხალხის წინააღმდეგ იმისათვის, რომ მომხდარიყო მათი დაშინება, დაეთესათ პანიკა და ასე შემდეგ. ეს სპექტაკლები დამთავრდა და აღარასოდეს გამეორდება. ეს არის ჩემი შეფასება და ძალიან მარტივი შესაფასებელია საზოგადოებისთვის, ან მათ უნდა აირჩიონ მშვიდობა, განვითარება და სტაბილურობა ან ისევ მსგავსი დადგმული ტერაქტების ეპოქა,"- განაცხადა ირაკლი ღარიბაშვილმა.

შეგახსენებთ, რომ 2008 წლის 21 მაისს ზუგდიდის რაიონის სოფელ ხურჩაში მომხდარი ტერაქტის გამოძიების ფარგლებში ყოფილი მაღალჩინოსნების ბრალეულობა გამოიკვეთა.

საქართველოს შინაგან საქმეთა სამინისტროს სახელმწიფო უსაფრთხოების სააგენტოს თანამშრომლებმა ტერორისტული აქტის მოწყობის ბრალდებით შსს კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა დააკავეს. შამათავასთან ერთად დაკავებულია სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია.

შსს ინფორმაციით, 2008 წლის 21 მაისს, ზუგდიდის რაიონის სოფელ ხურჩაში, მშვიდობიანი მოსახლეობის დაშინების მიზნით, რომან შამათავამ, შსს-ს სხვა მაღალ თანამდებობის პირებთან ერთად, ორგანიზება გაუკეთა და განახორციელა ტერორისტული აქტი, რამაც შექმნა ადამიანის სიცოცხლის მოსპობის და მნიშვნელოვანი ქონებრივი ზიანის განხორციელების საშიშროება, ასევე, ხელყო საზოგადოებრივი უსაფრთხოება.

გამოძიება საქართველოს სსკ-ის 323-ე მუხლის მე-2 და მე-3 ნაწილებით გათვალისწინებული დანაშაულის ნიშნებით მიმდინარეობს, რაც სასჯელის სახით 15-დან 20 წლამდე ან უვადო თავისუფლების აღკვეთას ითვალისწინებს.