"რამდენი ხანია, თავს ვიკავებ პრემიერ-მინისტრის დახასიათებისგან, დრო დადგა, ამდენი შეტევების შემდეგ ერთხელ მაინც ვთქვა, ბიძინა ივანიშვილს ზუსტად იმდენი წიგნი აქვს წაკითხული, რამდენიც ჯავახიშვილის პერსონაჟ ჯაყოს,"- ამის შესახებ საქართველოს პრეზიდენტმა მიხეილ სააკაშვილმა ჟურნალისტებთან საუბრისას განაცხადა.
ქვეყნის პირველი პირის თქმით, "ქართველი ხალხი არ არის თევზი, რომელსაც ერთი და იგივე ანკესს ჩაუგდებ და რამდენჯერმე წამოაგებ და ხალხი სწავლობს გამოცდილებაზე".
"რამდენიმე დღეში საპრეზიდენტო არჩევნებია საქართველოში, მე მოვისმინე პრემიერ-მინისტრ ივანიშვილის თავდასხმები ჩემზე, რაღაც მითიურ შეთითხნილ სისხლის სამართლებრივ საქმეებთან დაკავშირებით. რამდენი ხანია, თავს ვიკავებ პრემიერ-მინისტრ ივანიშვილის დახასიათებისგან, იმიტომ, რომ ეს სხვა თუ არაფერი ქართველი ხალხის არჩეული მთავრობაა და ჩვენ ქართველი ხალხის არჩევანს პატივი უნდა ვცეთ. დრო დადგა ამდენი შეტევების შემდეგ ერთხელ მაინც ვთქვა, ამ კაცს ზუსტად იმდენი წიგნი აქვს წაკითხული, რამდენიც ჯავახიშვილის პერსონაჟ ჯაყოს და ამას მე მგონი ყველა ვხვდებით. არა მხოლოდ მან არ იცის არცერთი უცხო ენა, არამედ ასეთი უბადრუკი ქართული მე ცხოვრებაში არ მომისმენია, რაც ამ ქვეყნად ვცხოვრობ, როგორიც მას აქვს. ერთადერთი ენა, რომელსაც ეს კაცი ფლობს, არის "ასავალ-დასავალის" ორღობის ბინძური ჭორების ენა, რომელმაც სხვათაშორის, არჩევნები მოაგებინა შარშან, მაგრამ ხომ არ შეიძლება, ის ფიქრობდეს, რომ ქართველი ხალხი არის თევზი, რომელსაც ერთი და იგივე ანკესს ჩაუგდებ და რამდენჯერმე წამოაგებ. შარშან არჩევნების წინ ხალხს უთხრეს, რომ ჩვენ მე და ჩემმა პარტიამ ცხრა თვის ბავშვი მოვკალით, ეს ხომ ბლეფი აღმოჩნდა. ბედუკაძე, რომლის დადგმული კადრებით მოიგეს არჩევნები, ლამის ნაციონალურ გმირად გამოაცხადეს. საქართველოს ჰყავს პრემიერ-მინისტრი, რომელიც ერთი წელი არ მიუწვევიათ არცერთ სერიოზულ ვიზიტზე, ეს უპრეცედენტო შემთხვევაა საქართველოში. საქართველოს ჰყავს პრემიერ-მინისტრი, რომელსაც მას შემდეგ, რაც საქართველოს იმიჯი ავამაღლე და წინ წავედით, დასცინის მთელი მსოფლიოს პრესა და ყველა პოლიტიკოსი, ვისაც შევხვდი. აღარც ლანძღავენ და აკრიტიკებენ, საქართველოს დასცინიან, პრემიერ-მინისტრის სახელს ტალახში ათრევენ. მისი კომუნიკაციის ინსტრუმენტი არის სიცრუე და ორღობის ჭორები. ქართველი ხალხი არც თევზია და არც სხვა რომელიმე ცხოველი, ხალხი სწავლობს გამოცდილებაზე. გაჭირვების და პრობლემების გამო მისცეს მათ ხმა, იმ იმედით, რომ რაღაცას შეცვლიდნენ უკეთესობისკენ, თორემ ჭორებით, რომ ვინმე სდომოდა ჩვენ ხალხს, "ასავალ-დასავალის" მთავარ რედაქტორს აირჩევდნენ საქართველოს პრეზიდენტად და პრემიერ-მინისტრადაც", - განაცხადა მიხეილ სააკაშვილმა.
