საქართველოს პრეზიდენტმა მიხეილ სააკაშვილმა დიღომში სახელმწიფოს მიერ ნაქირავები რეზიდენცია დღეს დაცალა და ოჯახთან ერთად ბარნოვის ქუჩაზე მდებარე მის საკუთარ საცხოვრებელ ბინაში გადავიდა.
სააკაშვილის თქმით, "ეს ბინა არ შეცვლილა ბოლო 10 წლის განმავლობაში, მაგრამ საქართველო შეიცვალა როგორც სასტუმრო "ივერია", რომელიც მაშინ იყო ლტოლვილებით სავსე"
"აქედან ჩანს რიყის მშენებლობები, ახალი იუსტიციის სახლი და უამრავი სხვა რაღაცა. მთავარი ის არის, რომ ამ წლების განმავლობაში ბევრი არაფერი მოგვმატებია მატერიალური თვალსაზრისით, მაგრამ სამაგიეროდ იმ ხალხს მინდა ვუთხრა, ვინც მატერიალურ გამორჩენას ეძებს, რომ მე ვნახე უზარმაზარი მატერიალური წინსვლა ბევრ პრობლემებთან ერთად ჩემი ქვეყნისთვის. ჩემი ბინა ისევ იგივეა და მინდა დავსვა კითხვა: არის თუ არა საქართველო სხვა ქვეყანა, ვიდრე იყო 10 წლის წინ?! ეს არის მთავარი კითხვა, რომელიც ყველა პრეზიდენტმა უნდა დასვას და არა ის, რომ მას რა გაუუმჯობესდა და მან რას გამოკრა ხელი საკუთარი ოჯახის და ნათესავებისთვის ან რა სარგებელი ან ხეირი ნახა. ეს ყველაფერი არაფერს არ ნიშნავს და საქართველო, ჩვენი ქვეყანა და მისი ცვლილებები ჩემთვის ყველაფერს ნიშნავს,"- განაცხადა მიხეილ სააკაშვილმა.
ქვეყნის პირველმა პირმა მისი ახალი პროექტის, საპრეზიდენტო ბიბლიოთეკის საკითხზეც ისაუბრა და აღნიშნა, რომ თავდაპირველად ბიბლიოთეკის მშენებლობა მისი ბებიის ყოფილი სახლის ტერიტორიაზე იგეგმებოდა. თუმცა შემდეგ უკეთესი ადგილი გამოჩნდა და შენობის იქ განთავსება გადაწყდა.
"ბებიაჩემმმა მზიამ მაჩუქა თავისი ერთსართულიანი სახლი და ეს სახლი დავანგრიე იმიტომ, რომ აქ ვაპირებდი საპრეზიდნტო ბიბლიოთეკის აშენებას, მერე უკეთესი ადგილი ვიპოვეთ საპრეზიდენტო ბიბლიოთეკისთვის და იქ გადატანა გადავწყვიტეთ. ბებიაჩემი დარჩა სახლის გარეშე და ახლა ეს მიწა იყიდება, რომ ამ მიწითაც დაფინანსდეს საპრეზიდენტო ბიბლიოთეკა. ბებიაჩემი გადავიდა დედაჩემთან სახლში, საერთო საცხოვრებელი აქვთ ახლა მოწყობილი და ახლა ეს სახლი საკომისიო მაღაზიას გავს, იმიტომ, რომ ბებიაჩემის მთელი ნივთები გადმოვიდა აქ. დედაჩემი მთელი 9 წელი ცხოვრობს ასე და რომ ყოფილიყო ამის შესაძლებლობა, დიდი სიამოვნებით გადავსახლდებოდით დიდ სახლში,"- აღნიშნა მიხეილ სააკაშვილმა და ბიზნესმენებს და დახმარების მსურველ ადამიანებს კიდევ ერთხელ მოუწოდა, რომ შესაძლებლობის ფარგლებში ახალი საპრეზიდენტო ბიბლიოთეკის ასაშენებლად ფინანსური დახმარება გაიღონ.
"ძირითადი ფული, რითაც ეს გაკეთდება და რამდენიმე ასეული ათასი დაჯდება სავარაუდოდ, ეს თანხა შემოვა კერძო შემოწირულობის სახით და ასეთი პრაქტიკა მსოფლიოში ძალიან ფართოდაა გავრცელებული. თითქმის დარწმუნებული ვარ, რომ შევძლებ ამ ფულის მობილიზებას და უკვე ბევრი ვიღაცა გვპირდება. რამდენიმე ადგილზე მსოფლიოში უკვე გვქონდა ამაზე ლაპარაკი და უკვე ჩავედი კიდევაც ერთ-ორ ადგილზე და ველაპარაკე ხალხს, ვისაც აქვს ფული, იმ ბიზნესმენებს, რომლებსაც საქართველოს და წინა წლებში ჩვენს მიერ გატარებული რეფორმების მიმართ სიმპათია აქვთ. მე არასოდეს მათთვის პირადად ჩემთვის არაფერი არ მომითხოვია და ეს ყველამ ვიცით, მაგრამ საქართველოსთვის მომითხოვია, რომ გაეკეთებინათ რაღაცეები და ამჯერად ვთხოვ ჩემი ბიბლიოთეკისთვის. იქ იქნება სტენდები გამსახურდიაზეც, შევარდნაძეზეც, პრეზიდენტის ინსტიტუტზეც, მაგრამ ძირითადა იქნება სასწავლო დანიშნულების. ამის გარდა მე ვთხოვ ხალხს, რომ შემოგვწირონ წიგნები. წიგნები ძალიან გვჭირდება და ძალიან ძვირი ღირს. ჩვენ ახლა გვაქვს დაახლოებით 3 000 - 4 000 წიგნი და ალბათ 5 000-მდე ავალთ მალე, 10 000 წიგნამდე რომ ავიდეთ, მე ჩავთვლი, რომ შედეგი მიღწეულია. ეს მართლა იქნება მხოლოდ ბიბლიოთეკა, ეს არ იქნება პარტიული ცენტრი. პარტიული ცენტრი სხვაგან არის. ამაში არის ერთი აზრი, ჩვენი მთავარი პრობლემა ყოველთვის იყო არა პოლიტიკური ამბიციების ნაკლებობა, არამედ განათლების ნაკლებობა, ბოლო წლებში განსაკუთრებით. ამის გადალახვას მართლა მოვანდომებ მთელს ჩემს ენერგიას,"- განაცხადა მიხეილ სააკაშვილმა.