"მარგველაშვილი არის წვერებიანი ბოკერია, "ენ-დი-აის" და თავისუფლების ინსტიტუტის დამფუძნებელი,"- ამის შესახებ საქართველოს პრეზიდენტობის კანდიდატმა, "ლეიბორისტული პარტიის" ლიდერმა შალვა ნათელაშვილმა TV-3-ის გადაცემა "დიდი პოლიტიკის" ეთერში სტუმრობისას ისაუბრა.
ნათელაშვილის თქმით, მმართველი კოალიციის საპრეზიდენტო კანდიდატი გიორგი მარგველაშვილი თავის დროზე ვარდების რევოლუციის რევოლუციური კომიტეტის წევრი იყო, შემდეგ კი, ნინო ბურჯანაძის მიერ 2008 წლის საპარლამენტო არჩევნებისთვის შედგენილ საარჩევნო სიაშიც ჩასვეს, თუმცა მიხეილ სააკაშვილმა მისი კანდიდატურა დაბლოკა.
"ჯერ იყო ვარდების რევოლუციის "რევკომის" წევრი, მერე ბურჯანაძის მიერ 2008 წელს შედგენილი საპარლამენტო სიიდან სააკაშვილმა ამოაგდო და ამოჰკრა პანღური,მერე უკვე გახდა ბურჯანაძის ფონდის თავმჯდომარე, მერე პატარკაციშვილს მიაკითხა, მერე კი მიაკითხა ივანიშვილს. კერძო უნივერსიტეტის რექტორი, უგულო კაცი, რომელიც სტუდენტებს გადაუხდელობის გამო სასწავლებლიდან რიცხავს, ჩვენ რომ არ გადავიხდით გადასახადს ან ბანკის პროცენტს, ალბათ აგვაფეთქებს,"- განაცხადა შალვა ნათელაშვილმა.