"ჩიპოლინოს და პინოქიოს უფრო მეტი რეიტინგი აქვს საზოგადოებაში, ვიდრე ბაქრაძეს. ბაქრაძე არის სააკაშვილი, ოღონდ ბაქრაძის გვარით,"- ამის შესახებ საქართველოს პრეზიდენტობის კანდიდატმა, "ლეიბორისტული პარტიის" ლიდერმა შალვა ნათელაშვილმა TV-3-ის გადაცემა "დიდი პოლიტიკის" ეთერში სტუმრობისას ისაუბრა.
ნათელაშვილის თქმით, წინასაარჩევნო შეხვედრებზე ამომრჩევლების განწობიდან გამომდინარე, იგი დარწმუნებულია, რომ არჩევნებს პირველივე ტურში მოიგებს და თუ ეს ასე არ მოხდა, მხარდამჭერების მობილიზებით და საპროტესტო აქციებით იმუქრება.
"შიდაპარტიული კვლევების გარდა მნიშვნელოვანია ხალხის სულიერი კვლევები. მე გუშინ მოვრჩი საქართველოს 700 სოფლის შემოვლას 2 თვის მანძილზე. ეს არის რეკორდი, რომელიც შეიძლება თავისუფლად შევიდეს გინესის შესაბამის წიგნში და არათუ ქართულ პოლიტიკაში, არამედ მსოფლიო პოლიტიკაში ამ კუთხით ვერავინ გამეჯიბრება. ამ 700 სოფელში 100 000-ობით ადამიანს ჩავხედე თვალებში. პოლიტიკოსებს ფსიქოლოგია მაინც არ გვეშლება, როცა ხალხს არ უნდოდი, ესეც შესანიშნავად ჩანდა ყველა დონეზე, ადგილზეც და მასმედიის შემთხვევაში პირდაპირი ეთერების დროს. პირველ ტურშივე ვარ გამსვლელი, სხვა შემთხვევაში ჩავთვლით, რომ ეს არის გაყალბება, ფალსიფიცირება, ხალხს დავუძახებთ ქუჩაში და ცხვირიდან ძმარს ვასხმევინებთ ივანიშვილის ხელისუფლება იქნება თუ სააკაშვილის. ჩიპოლინოს და პინოქიოს უფრო მეტი რეიტინგი აქვს საზოგადოებაში, ვიდრე ბაქრაძეს. ბაქრაძე არის სააკაშვილი, ოღონდ ბაქრაძის გვარით. ბაქრაძეს რომ რაღაც წარმატება ჰქონდეს ამ არჩევნებში, ჩათვალეთ, რომ 1 - 2 წელიწადში მიშა დაგვიბრუნდება უკან მმართველად. ფაქტიურად მიშა იყრის კენჭს ბაქრაძის სახით, ისევე როგორც ბურჯანაძე, ეს არის კაბიანი მიშა სააკაშვილი, ამაში ეჭვი არავის შეეპაროს,"- განაცხადა შალვა ნათელაშვილმა