საპარლამენტო უმრავლესობის წევრი ანი მიროტაძე დღეს გამოქვეყნებული მისი გადაბირების ამსახველი დოკუმენტაციის ნამდვილობის დასადგენად საქართველოს მთავარ პროკურატურას მიმართავს.
როგორც მიროტაძემ "ჯი-ეიჩ-ენთან" საუბრისას აღნიშნა, მისი სარჩელი საგამოძიები უწყებაში დღეს დღის ბოლომდე შევა.
"უნდა დადგინდეს ამ დოკუმენტების ნამდვილობა და უნდა დასრულდეს მსგავსი ცრუ ინფორმაციების გავრცელება. მე დღის ბოლომდე სარჩელს შევიტან პროკურატურაში და ყველაფერი გამოძიების შემდეგ დადგინდება,"- განაცხადა მიროტაძემ და დასძინა, რომ აღნიშნული ხელწერილების სიყალბის დადგენის შემთხვევაში აუცილებლად დადგება იმ ადამიანების პასუხისმგებლობის საკითხიც, რომლებმაც მისი გადაბირების ამსახველი დოკუმენტები მედიასაშუალებებით გაავრცელეს.
ანი მიროტაძის გადაბირების და კონსტიტუციური უსაფრთოხოების დეპარტამენტთან თანამშრომლობის ამსახველი ხელწერილის ასლი გაზეთ "ქრონიკა +"-ის დღევანდელ ნომერში გამოქვეყნდა.
„ცნობა ანი მიროტაძის გადმობირების თაობაზე გაცნობებთ, რომ მოვახდინეთ მოქ. ანი მიროტაძის გადმობირება. ანი მიროტაძე თანახმაა ითანამშრომლოს საქართველოს შსს კონსტიტუციური უსაფრთხოების დეპარტამენტთან და მოგვაწოდოს ცნობები ოპერატიულად საინტერესო ობიექტთა შესახებ და შეასრულოს ჩვენს მიერ წარდგენილი დავალებები. ა. მიროტაძეს განვუმარტეთ მისი უფლება-მოვალეობები, ჩავუტარეთ ინსტრუქტაჟი, რის შემდეგაც მან თანხმობა თანამშრომლობის შესახებ დაგვიდასტურა ხელმოწერით,"- აღნიშნულია ხელწერილის ასლში.