საქართველოს პრემიერ-მინისტრის ბიძინა ივანიშვილის განცხადებით, თავდაცვის სამინისტრო ერთ-ერთი წარმატებული უწყებაა და მისი ხელმძღვანელი ირაკლი ალასანიაც კარგი მინისტრია, თუმცა მასაც აქვს ცუდი თვისებები.
როგორც ივანიშვილმა ტელეკომპანია "იმედისთვის" მიცემულ ინტერვიუში აღნიშნა, იგი ირაკლი ალასანიასთან ინტენსიურ რეჟიმში მუშაობს, რომ არსებული ხარვეზები აღმოიფხვრას და ურთიერთობა ჩეულებრივ რეჟიმში ჩადგეს.
"ირაკლი ალასანიაც კარგი მინისტრია. მას აქვს კარგი პოლიტკური გამოცდილება, შეიძლება ითქვას, რომ ერთ-ერთი ყველაზე გამოცდილი პოლიტიკოსია ჩვენს გუნდში. მე მასთან ძალიან ბევრ დროს ვატარებ და ძალიან მინდა, რომ რაც არ მომწონს ის მოიხსნას. იდეალური არავინ არის. ყველაზე მეტ დროს მე ბერასთან ვატარებდი პრინციპში და ჩემს შვილებთან და ასევეა მინისტრები, სადაც შემიძლია მე ვეხმარები მათ და ვუსწორებ. ალასანიას აქვს ძალიან დიდი გამოცდილება, აქვს ბევრი კარგი თვისება, მაგრამ საჯაროდ არა. მე მაქვს შეკითხვებიც და მაქვს ის, რაც არ მომწონს და მასთან ვმუშაობთ, მაგრამ არ არის სწორი ასეთი დაპირისპირება, რომ მეკითხებიან - რატომ მარგველაშვილი და არა - ალასანია. ასე არაა, ალასანიას თავისი თვისებები აქვს. მე ვფიქრობ, რომ ძალიან წარმატებულად მუშაობს თავდაცვის სამინისტროც, ბოლო პრესკონფერენციაზეც ჩემთვისაც მოულოდნელი იყო ეს შეკითხვები გრიფი "საიდუმლოსთან" დაკავშირებით. ღმერთმა ქნას, რომ საბოტაჟი იყო, კითხვა დასვეს და ჩემი რეაქციაც ნახეთ, იმის შემდგომაც მე ალასანიასთან მქონდა შეხვედრაც, ვაგრძელებთ ჩვენ და ამას ყველაფერს დავალაგებთ, ეს ნორმალურია, კარგი პროცესია, რომ ამ დონის შეკითხვებია და არა ის, რომ თავდაცვის სამინისტროდან უამრავი ფული დაიკარგა. იდეალური არავინ არაა, შეიძლება მეც მეშლებოდეს და არ ვიყო იდეალური. რაღაცეები არ მომწონს და ვუსწორებ, ვეხმარები, მხარში უდგავარ, ბევრი შეხვედრები გვაქვს და ასე გავაგრძელებთ,"- განაცხადა ბიძინა ივანიშვილმა.