საქართველოს პრემიერ-მინისტრი ბიძინა ივანიშვილი თბილისის მერობის კანდიდატს პოლიტიკიდან წასვლამდე დაასახელებს. როგორც ივანიშვილმა ტელეკომპანია "იმედისთვის მიცემულ ინტერვიუში აღნიშნა, მას უკვე მოფიქრებული აქვს ადგილობრივი თვითმმართველობის არჩევნებზე თუ ვისი კანდიდატურა შეიძლება დააყენოს მმართველმა კოალიციამ დედაქალაქის მერის პოსტზე.
"როდესაც დავასახელებ პრემიერს, ამის შემდგომ ვიტყვი ვინ წარმომიდგენია ქალაქის მერის პოსტზე. მე მაქვს ჩემი წარმოდგენა და მე მგონი, რომ ძალიან ღირსეული კანდიდატურაა. მე მაქვს თავში და ამაზე მით უმეტეს წარმოდგენა არ აქვს არც იმ კანდიდატს და არც გუნდს, მაგრამ მე ვფიქრობ, რომ ძალიან ღირსეული კანდიდატი მყავს და მაქვს მხედველობაში მე თვითონ. მეურნე უნდა იყოს პირველ რიგში ქალაქის მერი, საქმი მკეთებელი უნდა იყოს და კარგი მენეჯერი უნდა იყოს,"- განაცხადა ბიძინა ივანიშვილმა.
პრემიერ-მინისტრი გიგი უგულავას იმ განცხადებასაც გამოეხმაურა, სადაც იგი ამბობს, რომ 2014 წელსაც აპირებს დედაქალაქის მერის პოსტზე კენჭისყრას. ივანბიშვილის თქმით, ეს მისი ნებაა.
რაც შეეხება გავრცელებულ ინფორმაციას, რომ შესაძლოა დედაქალაქის მერის არჩევნებში მონაწილეობა მიხეილ სააკაშვილმაც მიიღოს, ივანიშვილის თქმით, ეს მისთვის სურპრიზი იყო.
