"თუ ეს მომეხსნება, მე თავისუფალი კაცი ვიქნები, მე მხოლოდ ვალდებულება მტანჯავდა, როდესაც ვფიქრობდი და დღესაც მერიდება,"- ამის შესახებ საქართველოს პრემიერ-მინისტრმა ბიძინა ივანიშვილმა ტელეკომპანია "იმედის" გადაცემა "პოლიტიკის დროში" სტუმრობისას ისაუბრა.
ივანიშვილის თქმით, იგი პოლიტიკაში მხოლოდ იმიტომ მოვიდა, რომ სჭირდებოდა სამშობლოს და ქართველ ხალხს და თუ ეს ვალდებულება მოეხსნება, უზარმაზარ ტვირთსაც მოიშორებს.
"აბსოლუტურად თავისუფალი ადამიანი ვიქნები და უზარმაზარი ტვირთი ჩამომეხსნება ჩვენში რომ დარჩეს, დარჩენილ დროს, მებაღეობა მიყვარს ძალიან და გავატარებ, დავრგავ ხეებს. როცა ვნახულობ თავისუფალ დროს, ახლაც მოვახერხე ბოლო ორი კვირის განმავლობაში რამდენიმე ხის დარგვა და უბედნიერესი კაცი ვარ. მე კი მგონია, რომ სწორი გზით მივდივართ, მაგრამ თუ წარმოვიდგენთ, რომ ხალხს ეს ან არ ესმის, ან შეიძლება შენ გეშლებოდეს, მე თავს არასოდეს მოვახვევ,"- განაცხადა ბიძინა ივანიშვილმა.
