საპარლამენტო უმრავლესობის წევრები უარყოფენ ინფორმაციას იმის შესახებ, რომ მათსა და თავდაცვის მინისტრ ირაკლი ალასანიას შორის დაპირისპირებაა.
პარლამენტის ადამიანის უფლებათა დაცვის კომიტეტის თავმჯდომარის ეკა ბესელიას განცხადებით, მისთვის გაუგებარია ვის ინტერესებში შეიძლება შედიოდეს მსგავსი ტიპის ინფორმაციების გავრცელება.
"ძალიან ხელოვნურად ხდება ამ თემის წამოწევა, არ ვიცი ვისთვის არის ეს საინტერესო და ვის ინტერესებში შედის, რომ პოლიტიკურ დღის წესრიგში მუდმივად გააჩნდეს, რომ რაღაც ხდება თითქოს, დაპირისპირების მაგვარი ირაკლი ალასანიას და კოალიციის წევრებს შორის. მინდა გითხრათ და დაგარწმუნოთ, რომ არაფერი ამდაგვარი არ ხდება, მგონია, რომ ძალიან ხელოვნურად ხდება ამ თემის წინ წამოწევა,"- განაცხადა ეკა ბესელიამ.
აღნიშნულ საკითხზე კომენტარი საპარლამენტო უმრავლესობის წევრმა ლევან ბერძენიშვილმაც გააკეთა. დეპუტატი მიიჩნევს, რომ მსგავსი შინაარსის ინფორმაციის გავრცელება მხოლოდ წინასაარჩევნო პერიოდს უკავშირდება და აღნიშნული ინფორმაციის გავრცელება სათავეს მმართველი კოალიციის კონკურენტი საარჩევნო შტაბებიდან იღებს.
"ეს ხმები მომდინარეობს წინასაარჩევნო სხვა შტაბებიდან. არანაირი დაპირისპირება არ არსებობს, ამის საფუძველი არ არის, ხოლო დაპირისპირების და გუნდის დასუსტების სურვილი აქვთ ჩვენს მეტოქეებს საპრეზიდეტო არჩევნებში. ყოველთვის, როცა საპრეზიდენტო არჩევნების წინა პერიოდში ითქმევა ასეთი რამეები, უნდა იცოდეთ, რომ ეს უკავშირდება მხოლოდ არჩევნებს და სიმართლესთან პირდაპირი კავშირი ამას არ აქვს,"- განაცხადა ლევან ბერძენიშვილმა.