საქართველოს ცენტრალურ საარჩევნო კომიაიაში არ ადასტურებენ ფაქტს, რომ ავღანეთი გახსნილ საარჩევნო უბანზე "ნაციონალური მოძრაობის" საპრეზიდენტო კანდიდატმა დავით ბაქრაძემ გაიმარჯვა.
როგორც ცესკო-ს პრეს-სპიკერმა ეკა აზარაშვილმა "ჯი-ეიჩ-ენთან" საუბრისას განმარტა, ავღანეთის სპეცუბანიდან ბიულეტენები უკვე ჩამოიტანეს საქართველოში, თუმცა ის ჯერ-ჯერობით დალუქულ მდგომარეობაშია და შეუძლებელია იმის განსაზღვრა, თუ რომელმა საპრეზიდენტო კანდიდატმა მოიგო.
ამასთან, აზარაშვილის თქმით, ავღანეთის სპეცუბნის დალუქული საარჩევნო ყუთი 27 ოქტომბერს გაიხსნება და მასში არსებული ბიულეტენები საქართველოში ხმის მიცემის პროცესის დასრულების შემდეგ, კანონით დადგენილი წესების თანახმად დაითვლება.
"პირველ რიგში, ვიტყვი, რომ კენჭისყრა ნამდვილად ჩატარდა და ის სპეცჯგუფები, რომლებიც გაგზავნილნი იყვნენ ავღანეთში კენჭისყრის ჩასატარებლად, უკვე საქართველოში არიან. შესაბამისად, საქართველოშია ჩამოტანილი დალუქული ყუთებიც. დალუქულ ყუთებს ცესკო გახსნის და ხმებს დაითვლის არჩევნების დღეს, მანამდე ის იქნება დალუქულ მდგომარეობაში. ასე რომ, სანამ ეს ყუთი არ გაიხსნება, ანუ არჩევნების დღე არ მოვა და ცესკო-ს წევრები არ დაითვლიან ამ ხმებს, მანამდე ფიზიკურად ვერავის ვერ ეცოდინება რამდენმა ამომრჩეველმა მიიღო მონაწილეობა და როგორ გადანაწილდა მათი ხმები კანდიდატებს შორის. რომელმა კანდიდატმა გაიმარჯვა ამათუიმ უბანზე, ამის დადასტურება მხოლოდ მაშინ შეგვეძლება, როდესაც ეს ყუთები გაიხსნება, ცესკო შედეგებს დაითვლის და ოფიციალურ მონაცემებს გამოვაქვეყნებთ,"- განაცხადა ეკა აზარაშვილმა და დასძინა, რომ ამ ეტაპზე დალუქულია მონაცემები იმის შესახებაც, თუ რამდენმა ამომჩეველმა მიიღო მონაწილეობა ავღანეთის სპეცუბანზე ჩატარებულ კენჭისყრაში.
"ამომრჩევლების რაოდენობას ჯერ ვერ დავასახელებთ, დალუქულია ეს სიები, ყველაფერი დალუქულია, რაც ამ არჩევნებს უკავშირდება. არჩევნების დღეს, 27 ოქტომბერს ცესკო გახსნის ამ ყუთებს და კომისიის წევრები თვითონ დაითვლიან ამ ხმებს კანონის მიხედვით,"- აღნიშნა აზარაშვილმა.
ცნობისთვის, დღეს გავრცელდა ინფორმაცია, რომ ავღანეთის სპეცუბანზე ჩატარებული არჩევნების შედეგად კენჭისყრაში "ნაციონალური მოძრაობის" საპრეზიდენტო კანდიდატმა გაიმარჯვა.
