ექსპერტი მამუკა არეშიძე მიიჩნევს, რომ ჯარიკსაცემის მოწამვლის ფაქტთან დაკავშირებით საქართველოს პრემიერ-მინისტრის მიერ დღეს გაკეთებული განცხადებები შესაძლოა, მხოლოდ საკითხისადმი ივანიშვილის პირადი ემოციური დამოკიდებულებით ყოფილიყო გამოწვეული.
როგორც არეშიძემ "ჯ-ეიჩ-ენთან" საუბრისას აღნიშნა, საზოგადოებაში დადის გარკვეული მოარული ხმები, რომ ალასანიას მიმართ არც თუ ჯანსაღი დამოკიდებულებაა გუნდის შიგნით, მაგრამ ამაზე მაღლა კოალიციის ერთიანობის შენარჩუნების აუცილებლობა დგას.
"არ მგონია ეს დარტყმა ყოფილიყო. ის ასეთი ტიპია. შეიძლება ეს განცხადება ემოციური დამოკიდებულების გამომჟღავნება იყო კონკრეტული ფაქტის მიმართ. ასეთი ადამიანია ზოგადად. კარგია თუ ცუდი, ეს მეორე საკითხია. მაგრამ მე უკვე ვიცი მისი ეს ემოციური მანერა და აქედან გამომდინარე არ მიკვირს. საზოგადოებაში გარკვეული მოარული ხმები არის, რომ ალასანიას მიმართ არც თუ ჯანსაღი დამოკიდებულება არის, მაგრამ ვთვლი, რომ ამაზე მაღლა დგას კოალიციის ერთიანობის შენარჩუნების აუცილებლობა,"- განაცხადა მამუკა არეშიძემ
ექსპერტი მიიჩნევს, რომ ბიძინა ივანიშვილის დღევანდელი პრესკონფერენცია სრულიად განსხვავდებოდა წინა ორი შეხვედრისგან, რადგან ბევრად კონსტრუქციული, საქმიანი და კორექტული იყო.
"მე ვთვლი, რომ ეს ზუსტად იმიტომაც იყო ასე, რომ არჩევნები კარზეა მომდგარი და ივანიშვილი შეეცადა ეს პლატფორმა საარჩევნო საუბრისთვის გამოეყენებინა,"-აღნიშნა არეშიძემ.
რაც შეეხება საპრეზიდენტო არჩევნების მეორე ტურთან დაკავშირებით ივანიშვილის მიერ გაკეთებულ განცხადებებს, არეშიძის თქმით, ბიძინა ივანიშვილი სრულად დარწმუნებულია მისი საპრეზიდენტო კანდიდატის გამარჯვებაში და დღევანდელი მესიჯები მხოლოდ ამომრჩევლის ინერტულობის დაძვრისკენ იყო მიმართული, რადგან პრემიერს გასულ არჩევნებზე მიღებული შედეგების მსგავსის დაფიქსირება სურს.
"დამრჩა შთაბჭდილება, რომ ივანიშვილი დარწმუნებულია, რომ პირველივე ტურში გაიმარჯვებს მარგველაშვილი. მაგრამ პრემიერს უნდა ის, რომ გამეორებული იყოს შარშანდელი არჩევნების შედეგი. ეს განცხადებები მოსახლეობის ინერტულობის დასაძრავად იყო გაკეთებული, ანუ მას უნდა, რომ არჩევნებს ჰქონდეს ინტენსიური მოსვლის სახე. მე მგონი ამაზე იყო ორიენტირებული მისი განცხადებები,"- განუცხადა "ჯი-იჩ-ენს" მამუკა არეშიძემ და დასძინა, რომ პრემიერ-მინისტრის მიერ მისი შემცვლელის ვინაობის დასახელების ვადებთან დაკავშირებით გაკეთებული განცხადება მიზანშეწონილი იყო, რადგან წინასაარჩევნო პერიოდში ივანიშვილის შემცველელის დასახელება მედიის ყურადღების ამ ფაქტზე გადართვას გამოიწვევს და არჩევნები ყურადღების მიღმა დარჩება, ამიტომ ივანიშვილი მაქსიმალურად ცდილობს მთელი ყურადღება საპრეზიდენტო არჩევნებზე იყოს კონცენტრირებული.
მამუკა არეშიძემ "ჯი-ეიჩ-ენთან" საუბრისას აღნიშნა, რომ თავდაცვის ყოფილი მინისტრის დავით კეზერაშვლის დაკავება და ხმაურიანი სისხლის სამართლის საქმეების წინა პლანზე წამოწევა კოალიცია "ქართული ოცნების" რეიტინგზე დადებითად აისახა.
"მას შემდეგ, რაც გარკვეული ნაბიჯები გადაიდგა ხელისუფლების მხრიდან, რომელიც დამსაშავეების დასჯაზეა ორიენტირებული, კეზერაშვილის ფაქტორის შემდეგ მივადევნე თვალყური რეიტინგებს და მისი დაპატიმრების შემდეგ მმართველი პარტიის რეიტინგმა აიწია. გარდა ამისა, საზოგადოება ელოდება, რომ გარკვეული ინფორმაცია გაჟღერდება იმ ამბებთან დაკავშირებით, რაც საზოგადოებისთვის ძალიან მნიშვნელოვანი იყო და არის კიდევაც. ამ აქტივობების ფონზე საზოგადოების განწყობები ასე ვთქვათ, გადაიხარა მმართველი გუნდისკენ. სწორედ იმიტომაა ივანიშვილი ასეთი აქტიური, რომ სამართლიანობის აღდგენის პროცესი გაიჭიმა,"- განაცხადა არეშიძემ.
