საქართველოს პრემიერ-მინისტრის ბიძინა ივანიშვილის განცხადებით, "ნაციონალური მოძრაობის" წარმომადგენლებიც ქართული საზოგადოების წევრები არიან და მიუხედავად მათი პოლიტიკური ხედვებისა, მათი დისკრიმინირება დაუშვებელია.
როგორც ივანიშვილმა ცენტრალური რადიოსადგურების და ბეჭდური გამოცემების წარმომადგენლებთან შეხვედრაზე განაცხადა, მას "ნაციონალური მოძრაობის" დანგრევა და განადგურება არ სურს და ისინი ნელ-ნელა ქართული საზოგადოების ღირსეული წევრები გახდებიან.
"რატომ უნდა მსურდეს კაცო ეს, გიჟი ხომ არ ვარ?! მე მინდა რომ ჩემს ქვეყანაში ყველა ბედნიერი იყოს, მათ შორის "ნაციონალური მოძრაობაც". არ გავავლოთ ეს ხაზი. გარწმუნებთ, ისინი ნელ-ნელა ჩვენი საზოგადოების ღირსეული წევრები გახდებიან ნიჭიდან გამომდინარე. ზოგი ადრე შეძლებს, ზოგი გვიან გააცნობიერებს, მაგრამ ჩვენ უნდა მივცეთ საშუალება, რომ პოზიტივში გადმოვიდნენ, აღმშენებლობაზე იფიქრონ და არა - გუნდზე. ჩვენ ერთი გუნდი ვართ, ერთი საზოგადოება ვართ, ერთი ქვეყანა გვაქვს. სამშობლოზე უნდა ვიზრუნოთ ჩვენ. მიჯირყვნა არ მითქვამს და ჟურნალისტები, რომლებიც ამ სიტყვას ხმარობენ, თვითონ მიიწერონ, მე ვთქვი მიჭირხვნა. "ნაციონალური მოძრაობის" ზედმეტი მიჭირხვნით ჩვენ საკუთარ თავს ვაზიანებთ. ჩვენ ზომიერად უნდა მოვთხოვოთ პასუხი ვინც იძალადა, მაგრამ მუდმივად ძალადობით და შეხსენებით არაფერი გამოვა,"- განაცხადა ბიძინა ივანიშვილმა.
