,,ქდმ"-ს საპრეზიდენტო კანდიდატი გიორგი თარგამაძე პრემიერ-მინისტრს ბიძინა ივანიშვილს სასამართლოში უჩივის. მიზეზი ივანიშვილის დღეს გაკეთებული განცხადებაა, რომლის თანახმად თარგამაძეს მოღალატე უწოდა.
თარგამაძის განცხადებით, ბიძინა ივანიშვილმა ბრალის დასამტკიცებლად სასამართლოში კონკრეტული მტკიცებულებები უნდა წარმოადგინოს.
,,აღარ ვიცი ამ ყველაფერზე გამეცინოს თუ ნაწყენი დავრჩე. ეს არ არის მხოლოდ პოლიტიკური შეფასება, ეს არის სერიოზული ბრალდება. არ მინდა ამ შეურაცხყოფას შეურაცხყოფითვე ვუპასუხო. ამ ადამიანს როგორც ჩანს ამ საქმეში ვერ გავეჯიბრები. მინდა გითხრათ, რომ როგორც ჩანს პრემიერს უბრალოდ კარგად არ ესმის ზოგიერთი სიტყვის შინაარსი. ეს აღარ არის ზოგადი შეფასება. ის ბრალდება, რომ მე სახელმწიფო მოღალატე ვარ, აბსურდია. თუ მას არ ესმის ამ სიტყვის შინაარსი, მივმართავ სასამართლოს, სადაც მას დეტალურად აუხსნიან, თუ რას ნიშნავს სახელმწიფო ღალატი და როგორ უნდა აგოს პასუხი ადამიანმა მსგავსი განცხადებისთვის, რაც არ უნდა ბევრი ფული და მაღალი თანამდებობა ჰქონდეს. მე არ ვაპირებ სახელმწიფო მოღალატის სტატუსით ვიარო პოლიტიკაში. თუ კი ივანიშვილს ამ ბრალდების მტკიცებულებები გააჩნია სასამართლოში წარმოადგინოს, თუ არა და მან პასუხი უნდა აგოს ცილისწამებისთვის როგორც ჩემი, ასევე ჩემი ამომრჩევლის წინაშე"-განაცხადა გიორგი თარგამაძემ.
შეგახსენებთ, რომ პრემიერ-მინისტრმა ბიძინა ივანიშვილმა ცენტრალური რადიოსადგურების და ბეჭდური გამოცემების წარმომადგენლებთან შეხვედრაზე განაცხადა, რომ გიორგი თარგამაძის/; პოზიცია ქვეყნის საწინააღმდეგოდ და მოღალატის ეტალონს ჰგავს ეს კაცი ჩემს თვალში".
"ამასაც კი 1-2% აქვს. ამ მოსახლეობასაც გაგებით ვეკიდები. მესმის, რომ ბევრს არ აქვს ანალიზის გაკეთების სწორი უნდარი და ახერხებენ ხალხის შეცდომაში შეყვანას. არ იფიქროთ, რომ მე მხოლოდ ის იდეოლოგია მაქვს, რომ აუცლებლად მხოლოდ ჩვენ უნდა დაგვიჭირონ მხარი. ისეთი საზოგადოება უნდა მივიღოთ, სადაც იქნება იდეოლოგიური ბრძოლა, როდესაც პარტიებს აირჩევენ მათგან გაცხადებული პროგრამით, როდესაც თითოეულ პოლიტიკოსს ექნება კარგი წარმოდგენა, კარგი ანალიზის საშუალება და მაშინ გააკეთებენ არჩევნებს,"- განაცხადა ბიძინა ივანიშვილმა.