"თუ საპრეზიდენტო არჩევნების მეორე ტური დაინიშნა, მარგველაშვილს ვურჩევდი არ მიიღოს მონაწილეობა,"- ამის შესახებ საქართველოს პრემიერ-მინისტრმა ბიძინა ივანიშვილმა ცენტრალური რადიოსადგურების და ბეჭდური გამოცემების წარმომადგენლებთან შეხვედრისას ისაუბრა.
პრემიერ-მინისტრის თქმით, თუ მომავალ არჩევნებში მმართველი კოალიციის კანდიდატმა მოსახლეობის სათანადო მხარდაჭერა არ მოიპოვა, მოვლენების შემდგომი განვითარება ძალიან უხერხული იქნება.
"მე პოლიტიკაში მოვედი მხოლოდ ვალდებულების გრძნობით. ჩემთვის სამშობლო ოჯახივითაა და ოჯახში ყველამ ის უნდა გააკეთოს, რის შესაძლებლობაც აქვს. მე პოლიტიკაში ერთადერთი განცდით - ვალდებულების გრძნობით მოვედი და ზუსტად ასეთივეა გიორგი მარგველაშვილი. ის თვლის, რომ მას შეუძლია და უნდა გააკეთოს. ამის შემფასებელი არის საზოგადოება. მე მგონია რომ შემიძლია, გიორგისაც ჰგონია, რომ შეუძლია, მაგრამ თუ საზოგადოების განწყობა არჩვნებს, რომ შენ არც ისე შეგიძლია, ტყუილად ნუ იჭაჭები. იჭაჭები - ეს სიტყვა გაგიგიათ? მიჭირხვნაზეც გააკეთეს აქცენტი და ეს ქართული სიტყვაა. თუ საზოგადოება საეჭვოდ მიიჩნევს, რომ თურმე შენ არც ისე შეგძლებია, თამამად მოვიხსნი ამ ვალდებულებას. 2 წლის განმავლობაში ავად გახდომის უფლება არ მიმიცია ჩემი თავისთვის, დღედაღამე ვმუშაობდი და თუ ამას საზოგადოება სხვანაირად შეაფასებს, რა თქმა უნდა მე დიდი ტვირთი მომეხსნება და თავს არავის მოვახვევ ჩემს სამსახურს. ეს გიორგის გადასაწყვეტია და არავინ იფიქროს, რომ მე მას ვკარნახობ, ეს მისი გადასაწყვეტია. ასეთ შემთხვევაში მეორე ტურში მონაწილეობას არ მივიღებდი,"- განაცხადა ბიძინა ივანიშვილმა.