პარალმენტის თავმჯდომარე დავით უსუფაშვილი ლიტვის საგარეო საქმეთა სამინისტროდან ვილნიუსის სამიტზე დასასწრებად ოფიციალურ მოწვევას ეხმაურება. როგორც ჟურნალისტებთან უსუფაშვილმა განაცხადა აღმოსავლეთ პარტნიორობის სამიტზე დასასწრებლად პერსონალურ მოსაწვევებს ჯერ ვერ აგზავნიან.
,,ვილნიუსში 28-29 ნოემბერს გაიმართება სამიტი, რომელზეც ქვეყანა მიწვეულია, მაგრამ პერსონალურ მოსაწვევებს ჯერ ვერ აგზავნიან, რადგან საპრეზიდენტოა არჩევნებია ჩასატარებელი. მე კი ვიცი, ვინც იქნება პრეზიდენტი მაგრამ პრეზიდენტობის კანდიდატის რანგში მოსაწვევს ვერ გამოაგზავნიდნენ. ამასობაში პრემიერ-მინისტრმა ივანიშვილმა განაცხადა, რომ იგი თანამდებობის დატოვებას აპირებს ამიტომ გამორიცხული არ არის ვილნიუსის სამიტამდე ეს პროცესები განვითარდეს", _განაცხადა უსუფაშვილმა.
შეგახსენებთ, რომ ლიტვის საგარეო საქმეთა სამინისტროში „აღმოსავლეთ პარტნიორობის" ქვეყნების დიპლომატიური მისიების ხელმძღვანელებს ვილნიუსის სამიტზე დასასწრებად მოსაწვევები გადაეცათ. საქართველოს სახელით შესაბამისი მოწვევა ლიტვაში საქართველოს საგანგებო და სრულუფლებიან ელჩს ხათუნა სალუქვაძეს გადასცეს.
მოსაწვევები „აღმოსავლეთ პარტნიორობის" ექვსი ქვეყნის - საქართველოს, სომხეთის, მოლდოვას, უკრაინის და ბელორუსის ელჩებს ლიტვის საგარეო საქმეთა მინისტრის მოადგილემ ანდრიუს კრივასმა გადასცა.
მოსაწვევებს ხელს აწერს ლიტვის პრეზიდენტი დალია გრიბაუსკაიტე, ევროპული საბჭოს პრეზიდენტი ჰერმან ვან რომპუი და ევროკომისიის თავმჯდომარე ხოსე მანუელ ბაროსო.
ანდრიუს კრივასის მიერ გადაცემულ მოსაწვევებში აღნიშნულია, რომ ლიტვა, როგორც ევროკავშირის საბჭოს თავმჯდომარე, უდიდეს მნიშვნელობას ანიჭებს „აღმოსავლეთ პარტნიორობას". ლიტვის საგარეო საქმეთა მინისტრის მოადგილემ გამოთქვა რწმენა, რომ ვილნიუსის სამიტი მნიშვნელოვანი ნაბიჯი იქნება ევროკავშირის დიალოგის და „აღმოსავლეთ პარტნიორობის" თითოეულ ქვეყანასთან თანამშრომლობის გაღრმავების თვალსაზრისით. მან ასევე აღნიშნა, რომ სამიტის შედეგები პარტნიორ ქვეყნებს დაეხმარება ევროკავშირთან პოლიტური და ეკონომიკური თანხვედრის მიღწევაში.
ვილნიუსში „აღმოსავლეთ პარტნიორობის" რიგით მესამე სამიტი მიმდინარე წლის 28-29 ნოემბერს გაიმართება.
