საქართველოს შინაგან საქმეთა და თავდაცვის ყოფილი მინისტრი ბაჩო ახალაია ქვეყანაში კრიმინალური მდგომარეობის დამძიმებასა და ე.წ. ქურდული სამყაროს წარმომადგენლების გააქტიურებაზე საუბრობს. აღნიშნულთან დაკავშირებით ახალაიას განცხადებას "ჯი-ეიჩ-ენი" უცვლელად გთავაზობთ:
"რამდენიმე დღის წინ, ქურდულმა სამყარომ ვატო ყიფიანის მეთაურობით კიდევ ერთხელ გაბედა ხელი აეღო ადამიანის სიცოცხლესა და ჯანმრთელობაზე. სასტიკად იქნა ნაცემი ერთ-ერთი საპატიმროს დირექტორი. ეს არის კრიმინალური სამყაროს მცდელობა ჩამოშალოს სახელმწიფოს ფუნდამენტი, დაამყაროს ქვეყანაში ანარქია და ქაოსი. ისინი ცდილობენ დაგვაბრუნონ 90-იანი წლების დასაწყისში, როდესაც კრიმინალი იყო ქვეყნის ბატონ-პატრონი და ირგვლივ გამეფებული იყო გამოძალვა, შანტაჟი, ძალადობა და საქართველოს თითოეული მოქალაქე იმყოფებოდა საფრთხის ქვეშ. ვარდების რევოლუციის შემდეგ ჩვენ შევძელით მთლიანად მოგვერღვია ეს კრიმინალური სამყარო და მინდა ყველას ვუთხრა, განსაკუთრებით კი ორგანიზებული დანაშაულის წარმომადგენლებს, არავის ეგონოს, რომ ეს ბრძოლა სახელმწიფოს მარცხით დასრულდა. დღეს თუ ხვალ მე გამოვალ და ბოლომდე მივიყვან დაწყებულ საქმეს. მანამდე კი კრიმინალების მიერ ჩემთან ასოცირებულ სახელმწიფოს წარმომადგენლებზე ძალადობა უსუსურობის და ლაჩრობის ნიშანია და მეტი არაფერი. ორგანიზებული დანაშაული - ეს ერთერთი საშინელი დაავადებაა ქვეყნისთვის და ამ სენის ადგილი ჩვენს სახელმწიფოში არ არის,"- ნათქვამია ბაჩო ახალაიას განცხადებაში.