ევროინტეგრაციის საკითხებში სახელმწიფო მინისტრის ალექსი პეტრიაშვილის განცხადებით, ქართულ მხარეს იმედი აქვს, რომ ევროკავშირთან და ნატო-სთან დაახლოების კუთხით საქართველოს მოსახლეობის სწრაფვა ადეკვატურად იქნება ასახული ჩრდილოატლანტიკური საბჭოს გადაწყვეტილებებში.
"ყველა ერთხმად აღნიშნავს, რომ დემოკრატიული პროცესები ვითარდება პოზიტიურად. საქართველოს ხელისუფლება არ იშურებს ძალისხმ,ევას, რათა დაჩქარდეს ნატო-ში საქართველოს ინტეგრაცია. ვიმედოვნებთ, რომ მომავალ სამიტზე საქართველოს ხელისუფლების მიერ განხორციელებული ნაბიჯები, საქართველოს მოსახლეობის სწრაფვა, რათა საქართველო გახდეს ნატო-ს წევრი ქვეყანა და დაჩქარდეს ეს პროცესები, ადეკვატურად იქნება ასახული ნატო-ს გადაწყვეტილებებში,"- განაცხადა ალექსი პეტრიაშვილმა.
ალექსი პეტრიაშვილი კავკასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელს ჯეიმს აპატურაისაც შეხვდა. აღნიშნულ შეხვედრაზე მხარეებმა საქართველოს ნატო-ში გაწევრიანების პერსპექტივები განიხილეს და ამ მიმართულებით მიღწეულ პროგრესზე ისაუბრეს. ჯეიმს აპატურაიმ კიდევ ერთხელ დაადასტურა ჩრდილოატლანტიკური ალიანსის მზაობა განაგრძოს საქართველოს ევროატლანტიკური მისწრაფებების მხარდაჭერა.
კავკასიაში და ცენტრალურ აზიაში ნატო-ს გენერალური მდივნის წარმომადგენელმა ჯეიმს აპატურაიმ და ევროინტეგრაციის საკითხებში სახელმწიფო მინისტრმა ალექსი პეტრიაშვილმა საქართველოში მიმდინარე დემოკრატიულ პროცესებზე და 27 ოქტომბერს დაგეგმილი საპრეზიდენტო არჩვნების მაღალ დონეზე ჩატარების საკითხზეც გაამახვილეს ყურადღება.
