ნოემბერში ვილნიუსში დაგეგმილ ევროკავშირის სამიტამდე რამდენიმე დღით ადრე, ნატო რუსეთის საზღვრებთან ფართომასშტაბიან წვრთნებს ჩაატარებს.
სამხედრო წვრთნებში, რომლის სახელწოდებაც არის Steadfast Jazz ალიანსის 6000 ჯარისკაცი მიიღებს მონაწილეობას. წვრთნები 2-9 ნოემბერს პოლონეთსა და ბალტიის ზღვის რეგიონში გაიმართება.
EUobserver-ის ცნობით, წვრთნებში უკრაინელი ასი სამხედროც მიიღებს მონაწილეობას. ბოლო პერიოდში უკრაინასა და ჩრდილოატლანტიკურ ალიანსს შორის ურთიერთობა გაუმჯობესდა. ამ ერთობლივი წვრთნების გარდა, უკრაინა ავღანეთში ნატოს მისიაშიც იღებს მონაწილეობას. ნატოს გარდა, წინ მიიწევს უკრაინისა და ევროკავშირის ურთიერთობაც. 28 ნოემბერს, ლიტვაში უკრაინასა და ამ ორგანიზაციას შორის პოლიტიკური ასოციაციისა და თავისუფალი ვაჭრობის შეთანხმების ხელმოწერას ვარაუდობენ. ეს კი რუსეთის გეგმას დაუსვამს წერტილს, რომელიც უკრაინის "ევრაზიულ კავშირში" გაწევრიანებას გულისხმობს.