შესაბამისი განცხადება იაპონიის საელჩომ, ცხივნალის რეგიონის საოკუპაციო ხაზთან მიმდებარე სოფლებში საქართველოში აკრედიტირებული დიპლომატიური კორპუსის წარმომადგენელთა ვიზიტის შემდეგ გაავრცელა. განცხადებაში ნათქვამია, რომ იაპონია შეშფოთებით აკვირდება საოკუპაციო ხაზზე მიმდინარე პროცესებს.
„ჩვენ შეშფოთებით ვუყურებთ ამჟამინდელი მდგომარეობის ფიქსაციის მცდელობას, კერძოდ, სამხრეთ ოსეთთან და აფხაზეთთან - საქართველო ადმინისტრაციული საზღვრების გასწვრივ მავთულხლართებისა და ღობეების გავლებით, მიწაყრილების მოწყობითა და სხვა ქმედებებით.
სამხრეთ ოსეთსა და აფხაზეთთან დაკავშირებით, საერთაშორისო საზოგადოება, კონფლიქტის ყველა მხარესთან ერთად, მუშაობას აგრძელებს კონფლიქტის მშვიდობიანი გზით მოსაგვარებლად.
იაპონია მტკიცედ უჭერს მხარს, საქართველოს ტერიტორიული მთლიანობის პრინციპზე დაყრდნობით, კონფლიქტის მშვიდობიანი გზით მოგვარებას და ფიქრობს, რომ ამ მიზნის მისაღწევად ხელისშემშლელი ქმედებები თავიდან უნდა იქნეს აცილებული" -ნათქვამია იაპონიის საელჩოს განცხადებაში.