საქართველოს პრეზიდენტის მიხეილ სააკაშვილის განცხადებით, ქვეყანაში შექმნილი მძიმე ეკონომიკური მდგომარეობიდან და რუსეთის აგრესიული დამოკიდებულებიდან მინიმალური ზარალით გამოსასვლელად ერთადერთი გამოსავალი გაჩერებული დიდი ინფრასტრუქტურული პროექტების მშენებლობის გაგრძელება და ბოლომდე მიყვანაა.
ქვეყნის პირველი პირის თქმით, იგი მთავრობას რჩევას აძლევს თბილისის შემოვლითი რკინიგზის, ლაზიკის პორტის, რეგიონული კურორტების და სხვა მნიშვნელოვანი პროექტების განხორცილელება გაგრძელდეს.
"ჩემი რჩევა საქართველოს მთავრობისადმი იმიტომ, რომ მართლა დაინტერესებული ვარ, რომ ჩვენი ეკონომიკა არ დაინგრეს. იმიტომ, რომ ახლა ისეთ სიტუაციაში ვართ, რომ ჩქარა განვითარებადი ეკონომიკა არის ჩვენი დაცვა რუსეთის მზარდი აგრესიისგან, ლაზიკა იყო ჩვენი დაცვა რუსეთის მზარდი აგრესიისგან, ეს დიდი პროექტები, დიდი მშენებლობები და განვითარება ჩვენი დაცვაა რუსეთის მზარდი აგრესიისგან. ამიტომ, მე მარტო დღევანდელი საზომით კი არ ვუყურებ სიტუაცის, რომ მთავრობას ცუდად წაუვა საქმე და ჩვენ ამითი უფრო ჩქარა მოვბრუნდებით მთავრობაში. რა თქმა უნდა ასე არ ვუყურებ, იმიტომ რომ დღეს სცენარის ასე კატასტროფულად განვითარებამ შეიძლება საქართველოს საერთოდ წაართვას მომავალი - ოპოზიციასაც და უმრავლესობასაც. ერთადერთი რეცეპტი არის აამუშავონ ისევ დიდი პროექტები, დავამთავროთ თბილისის შემოვლითი რკინიგზა, მართლა გავაკეთოთ პორტი და შემდგომი ინფრასტრუქტურა, მართლა მივიყვანოთ ბოლომდე თეთნულდის, აჭარის, წყალტუბოს კურორტები, არ გადმოვიტანოთ პარლამენტი ქუთაისიდან, იმიტომ რომ ისინი გეგმავენ არჩევნების პირველივე ტურის შემდეგ კენჭი უყარონ ქუთაისიდან პარლამენტის გადმოტანას. ეს ძალიან დიდ დარტყმას მიაყენებს დასავლეთ საქართველოს ეკონომიკას. მოეშვით შეჩერებას და დამუხრუჭებას და დაპაუზებას, პაუზას ავუშვათ ხელი და ისევ "ფლეის" დავაჭიროთ, წავიდეთ წინ, გადავახვიოთ წინ, იმიტომ, რომ დრო დავკარგეთ. მარტო "ფლეი" არ უშველის, "ფასთ ფორვარდს" უნდა დავაჭიროთ და ცოტა ჩქარა წავიდეთ წინ, რადგან დროა დაკარგული. მუსიკალური ცენტრი ვისაც აქვს, ის მიხვდება რაზეც ვსაუბრობ. ეს არის ჩემი ერთადერთი რჩევა ამ სიტუაციაში,"- განაცხადა მიხეილ სააკაშვილმა.