საქართველოს პრეზიდენტის მიხეილ სააკაშვილის განცხადებით, იმის გამო, რომ რუსულმა მხარემ 2008 წლის აგვისტოს ომის მონაწილე სამხედრო მფრინავი ივანე ნეჩაევი სოჭის ოლიმპიადის ერთ-ერთ მთავარ მეჩირაღდნედ დაასახელა, საქართველოს აქვს კიდევ ერთი რეალური შანსი, რომ არნიშნული საკითხით საერთაშორისო თანამეგობრობის ყურადღება მიიქციოს.
სააკაშვილის თქმით, ახლა მთავარია საქართველოს მთავრობა და მისი ოპონენტები საერთო პოზიციის გარშემო გაერთიანდნენ, რადგან თუ ქვეყანას საერთაშორისო თანამეგობრობის მხარდაჭერა სჭირდება, ეს შიდაპოლიტიკური ერთიანობის გარეშე ვერ მიიღწევა.
"თუ კარგად გადავავლებთ თვალყურს ყველა პოლიტიკურ ინიციატივას, ჩვენ ვაკეთებდით ყველაფერს, რომ მსოფლიოს ყურადღება მიგვექცია სოჭისთვის. დღეს იმის გამო, რომ ნეჩაევი გამოწიეს, გვაქვს კიდევ ერთი ალბათობა, რომ მივიქციოთ ყურადღება. თუ ჩვენში არ არის საერთოდ პირველი საკითხი ოკუპაციასთან დაკავშირებული საკითხები, საიდან უნდა მოვთხოვოთ საერთაშორისო თანამეგობრობას, რომ მათთვისაც პირველი საკითხი იყოს?! ისინიც იტყვიან - თუ თქვენთვის არ არის პირველი, ჩვენთვის რატომ უნდა იყოს პირველიო. თუ ჩვენ ამ საკითხებზე არ ვართ ერთიანები, მერე როგორ უნდა მივმართოთ მოკავშირეებს, რომ იყონ ერთიანები?! ამიტომ, პრობლემა იმაშია, რომ ახლა ერთმანეთს ნიშანი კი არ უნდა მოვუგოთ, რაღაც საერთო პოზიცია თუ არ ჩამოვაყალიბეთ, საერთაშორისო საერთო პოზიციას ვერასოდე მივაღწევთ ამ საკითხებზე. თუ ჩვენთვის არ იქნა ეს მთავარი საკითხი, მათთვის მით უმეტეს, არ იქნება მთავარი საკითხი,"- განაცხადა მიხეილ სააკაშვილმა.
