"ონიშჩენკო, რომელმაც ხელახლა გააჩერა ქართული ღვინოები, მომავალში კიდევ ბევრჯერ გაგვამწარებს და ეგ კაცი პროფესიულ სადისტად არის დანიშნული პუტინის მხრიდან საქართველოს მიმართულებით და არა მხოლოდ საქართველოს, არამედ ყველა ჩვენი მოკავშირის მიმართულებით,"- ამის შესახებ საქართველოს პრეზიდენტმა მიხეილ სააკაშვილმა ჟურნალისტებთან საუბრისას განაცხადა.
სააკაშვილის თქმით, სოჭის ოლიმპიადაზე სამხედრო მფრინავის ნეჩაევის მეჩირღდნედ დანიშვნა და რუსეთის ფედერაციის მიერ საქართველოსადმი ბოლო პერიოდში განხორციელებული ქმედებები ძალიან სერიოზული თემებია და ყურადღების მიქცევას საჭიროებს.
ამასთან, ქვეყნის პირველი პირის განცხადებით, ქართველი სპორტსმენი ელენე გედევანიშვილი, რომელიც არის ერთადერთი მედლის პრეტენდენტი საქართველოდან, რუსებმა ნახირის გადამყვანი თვითმფრინავებით გამოაგდეს მათი ქვეყნიდან.
"ჯერ მისი ნათესავები და ოჯახის წევრები გამოაგდეს და მერე თვითონაც უთხრეს, რომ - ან შენ გადმოდიხარ, იღებ რუსეთის მოქალაქეობას, ან წადი აქედანო. მაშინ მან არჩია უარი ეთქვა მათ პრივილეგიებზე, მათ ნაკრებში გამოსვლაზე და მან აირჩია საქართველოს მხარეს წამოსულიყო ყოველგვარი იმის გარეშე, რომ ჩვენ რაღაცა მიგვეცა. მერე რეალურად შევეცადეთ, რომ მწვრთნელი მაინც გვეშოვა მისთვის. ამიტომ, ელენეს სამოქალაქო გმირობა ერთხელ უკვე გაკეთებული აქვს და არ მგონია, რომ აქ პრობლემა ელენეში იყოს. მით უმეტეს არ არის პრობლემა იმ დანარჩენ სპორტსმენებში, რომლებსაც არც აქვთ არაფრის შანსი. არც სანქციებში არ არის პრობლემა, იმიტომ რომ არსებულ გარემოებას ყველა მიხვდება და გაიგებს. მით უმეტეს, რომ არ ვართ ჩვენ ჯერ-ჯერობით განვითარებული ქვეყანა. ამიტომ, ეს საკითხი რა თქმა უნდა პირდაპირ კავშირშია ჩვენს ეროვნულ ღირსებასთან და პუტინის ქმედება პირდაპირ კავშირშია ჩვენი ეროვნული ღირსების დამცირებასთან, ყოველდღიურ გეგმაზომიერ შეხსენებასთან. ის ამითი გვცდის, აბა რამდენად წავუწვებით,"- განაცხადა მიხეილ სააკაშვილმა.
